Solief • Unscripted • Brolectual

Azizbek aka Rahimov bir podkastda aytyaptilar: "the ultimate bottleneck is the desire".

ya'ni eng katta to'siq bu xohish.

o'qishga kirib, o'qimay qo'ygan, yoki uy-mashina olib, o'z ustida ishlamay qo'yganlarga qarang;

hamma sharoiti zo'rligidan hech nima qilishni xohlamaydigan ko'pchilik o'quvchilarga qarang;

IELTS dan 7.0-8.0 olib, manzilga yetib keldim deydigan bolalarga qarang;

maktabda dars berarkanman, deyarli har kuni shuning guvohi bo'laman.

uzoqqa bormay, va eng avvalo, birovni gapirmay, o'zimni misol sifatida olsam:

tekinga ishlab yurgan paytimdagi drayv bilan oyligim o'rtachadan yuqoriga chiqqandagi drayvning orasida yer bilan osmoncha farq bor.

bu xuddi o'sha toshbaqa va quyon masalidagi complacency, ya'ni haddan tashqari xotirjamlikka berilishga o'xshaydi.

ammo xotirjamlik shunchalik kuchliligidan o'sish uchun harakat ham to'xtab qolgandi.

Alhamdulillah, hozir ancha o'nglandim.

yana o'sha drayv mana asta-asta qaytyapti.

buvijonimning bir gaplari bor.

avval ham aytganman, menimcha:

"qilaman degan odam ikki tog'ning orasida bo'lsa ham qilib qo'yaveradi"

xalqimiz buni "intilganga tole yor" deyishadi.

ustoz sifatida ham biz qilishimiz kerak bo'lgan ish bolaning ichidagu xohishni uyg'otish deb bilaman.

chunki bo'ynidan bog'langan it ovga yaramas.

chindan xohlaganlar esa tog'-u toshlarning orasida mol-qo'y boqib yurib, Anzirat buvi aytadigan "propessor" bolalarga aylanishyapti.

endi savol qoladi:

"xohishlarni qanday paydo qilsa bo'ladi?"

@soliefs

kanalning maqsadi yo'qolibdi.

postlar chiqyapti, ammo ularni birlashtirib turadigan bir yo'nalish qolmagandek.

qizig'i, inson bilan ham shunday.

100ta narsa qilishingiz mumkin, ammo baribir, hech qayerga siljimasligingiz mumkin.

axir nimadir qilish yo'nalish degani emas-ku.

shu "100ta narsaning o'zi" siljimaslikka muammodir, balki?

bu kanalning maqsadini topish uchun avval shu savolga javob berish kerakdir, balki?

"Siz bu kanalni nima uchun kuzatasiz?"

bu savol o'sha har post qo'yganimda shu kanalni ochadigan obunachilar uchun.

fikringiz qiziq. izohlarda qoldiring 👇

@soliefs

John: “Matn yozganimizda, o’quvchi asosan kim bo’ladi?”

Kursdoshlarim: “Do’stlarimiz, qayernidir rahbari, ota-onamiz …”

Men: “O’zimiz”

Shu javobimdan keyin John menga juda g’alati qaragandi, o’zi bu sog’mi deb =) 

2024-yil, iyul. CELTA darslari payti. Tashqariga xom go’sht qo’ysangiz, shashlik qilib pishiradigan yoz payti.

**************

Ha, inson o’zi uchun xat yozishi normal.

Bu yerda faol bo’lmay qolganimga asosiy sabab ham menimcha shu.

O’zimga ko’proq yoza boshladim. 

Bu yerga bo’lishgim kelmasdi.

Bir paytlar normal tuyulgan o’ziga-o’zi jamoat joyida xat yozish o’zimga ham g’alati ko’rinib qoladi deb o’ylamagandim.

Balki sabab har bir aytilgan gap va qilingan harakat ortidagi sabablarni o’zim xohlamagan tarzda savolga tutaverishimdir, bilmadim.

Hay, hay, hay, ehtiyot bo’ling. Bu kasallik sizga ham yuqib qolmasin. Juda odamni qiynab yuboradi.

Keyin bu kanal blogligi esimga tushib qoldi. 

To’g’ri, onda-sonda, yoki balki har doim, "mana shu mening qarichim va dunyo shu qarichimcha" degan postlar yozib turarman.

Har holda, eski, xuddi shu uslubda yozilgan postlarimni o’qisam, “Bu qanday sharmandalik?!” deb peshonamni ushlab qolaman.

Ammo, lekin, biroq (udzr, kopirayterlar, udzr!) …

Kanalni ochishdan maqsadim esimga tushib qoldi.

Ehh, maqsad unitilsa, qay go’rlarga yetaklamaydi, azizlar!

Shaxsiy blog insonning ba’zan bosgan yo’liga aylanib qoladi.

To’g’ri, insonning onlayn personaji hamda asliyati ba’zan ikki xil ko'rinib ham turar.

Ammo, inson o’zining qanday shakllanganini ko’rish uchun blogdan yaxshirog’ini topish qiyin.

Chunki yozganda fikrlar quyiladi.

Nega yopiq kanal emas?

Auditoriya bilan qiziq.

Biz ijtimoiy mavjudotlarmiz.

Doim nimadir bo’lishgimiz keladi.

Bu ham bir e’tiborda bo’lishning yo’llaridan biri.

Bunda hech qanday ayb ko’rmayman.

Imkoniyat bo’lsa, o’zidan kimdir yasab emas, balki boricha, samimiy o’z fikrlari bilan bo’lishib borishga nima yetsin.

Xullas, qiyinlashtirmang. Men ham qiyinlashtirmadim.

O’zim uchun yozdim. Eshitganlar auditoriya bo’ldi.

~ Solief

@soliefs

Hozir sotvoling, keyin to'layverasiz

Bizniki juda unga o'xshamasa-da (hozircha), Amerikadagi Housing Bubble ham aynan shunday yo'q pulga qilingan xaridlar tufayli paydo bo'lgandi.

Bunday xaridlar talabni sun'iy baland ushlab turishga va shuning uchun narxlarning qimmatlashishiga olib keladi.

Bundan ham yomoni, bu kredit tizimi kishilarning "faqat hozirini o'ylab, oqibatini kelajakka uloqtirishga" o'rgatib qo'ydi.

Biz nafaqat qarzga botgan jamiyat, balki hoziriga bandi avlod ham tarbiyalayapmiz.

@soliefs

Qarorga ta'sir qiluvchilar bor, qaror qiluvchi bor.

Bo'ri yesa ham, yemasa ham og'zi qon. Qarorni kim chiqardi? Men.

Demak, qarorimga ta'sir qiluvchilardan nolishga haqqim yo'q.

Hech kim yomon bo'lsin demaydi.

Shunchaki, o'yinda terimning yo'qligi vaziyatni to'g'ri baholashga to'siq bo'ldi.

Bunday vaziyatda mantiq ishlamaydi. Odam yashab ko'rmagunicha tushunmaydi.

Mantiqan hamma narsani yechishni iloji bo'lganda bitta bomba bilan hamma narsani yechsa bo'lardi.

Unday emas. Yashab ko'rish kerak. O'zi o'sha narsani his qilishi kerak.

Menimcha, qaror qilishni kimgadir topshirayotganda ana shu odam o'z qarorning oqibati ta'sir etadigan kishilarning hayotini kamida boshidan kechirgan yoki chindan his qilgan bo'lishi kerak.

Yo'qsa, mantiqqa tayanishga va keyinchalik ba'zan mantiq ham boshini changallaganicha qolishini ko'rishga majbur bo'laveradi.

Ehh, shunaqa gaplaaar, mantiq ahli.

@soliefs

Dramalashtirish

Ishlarning pachavasi chiqib turganda qilishimiz mumkin bo'lgan eng yaxshi ish bu ularning battar rasvo bo'lishiga sababchi bo'lmaslik.

Ba'zan vahimaga tushamiz. Ba'zan ortiqcha bo'rttirish orqali dramaga aylantiramiz. Kimga zarar? O'zimizga. Va ba'zan atrofimizdagilarga ham.

Shoshilmang. Vahima qilmang. Eng tig'iz vaziyatlarda ham bir necha daqiqa o'ylab olish ziyon qilmaydi.

Xullas, dramalashtirmang. Shuncha drama yetib ortadi.

@soliefs

Hamma odam ham kurslarni o'qish uchun emas, balki o'zini nimadir qilayotgandek ko'rsatish uchun sotib olisharkan.

1000lab odamga kurs sotgan Dovranbek aka Turdiyev shunday deb chiqibdilar itjimoiy tarmoqlarida.

Nimaga biz o'zimizni aldaymiz? Nega inson o'zini aldaydi?

Shu orqali vijdonchamizni yupatamiz. Yo'qsa, u bizni bemalol yashashga qo'ymaydi.

Albatta, agar hali ham tirik bo'lsa.

Keyin yupatish uchun yoki kamida ko'zini shamg'alat qilib turish uchun kurslar sotib olamiz.

Aslida unchalik ehtiyoj yo'q. Tabiatning qo'ng'irog'iga javob bergimiz kelganchalik xohlaganimiz yo'q.

Og'riq yo'q. To'qmiz.

Ammo vijdon qiynayapti.

Ijtimoiy tarmoqda kimdir nimagadir erishyapti.

Hamma harakat qilayotganini va kechasi bilan ishlayotganini ko'rsatyapti.

Ertansiga soat 10gacha uxlaganini emas.

Natijada vijdon qiynalishni boshlaydi.

Axir muhitmiz bir. Virtual olam.

Ming aqlli bo'lsangiz ham, o'zingizdan aqlliroqlar muhitida o'zingizni ahmoqdek sezasiz.

Virtual dunyo ko'pchilikni bitta muhitga tashlaydi.

Natijada shunday ichki bosim oshaveradi.

Ammo nega oxirigacha harakat qilmaymiz? Aksincha, vijdonimizni aldaymiz?

Chunki maqsad chindan biznikimas.

Chindan o'sishga xohish yo'q.

Birov majburlagani uchun qilgan ishingizni hech zo'r qilganmisiz?

Kunning oxirida, ularga sizning qanchalik o'sganingiz yoki qanchalik zo'rligingiz bir tiyinlik qiziqmas.

Xullas, hamma o'zi bilan o'zi ovora.

O'ssangiz, havas qiladiganlar ham, xasad qiladiganlar ham topiladi.

Ammo juda ko'pchilikka baribir bo'ladi.

O'zimizni aldamaylik.

Maqsadlardan og'ib ketyapmiz.

@soliefs

Noshpa kabi achchiq, ammo bosh og'rig'ini qoldiradigan bir video qildim.

Nassim Talebning biz yuqorida gaplashgan maslahatlarini kesib-kengaytirgan holda.

Sizga yoqimli tomosha tilab,

@soliefs

Aytgancha, obuna bo'lish va o'z fikrlaringizni izohlarda bo'lishish esingizdan chiqmasiiiiin )) Rahmat oldindan.

Video linki: https://youtu.be/-k6fQlf53Y0

Video faqat IELTS haqida emas

Agar Instagramingiz bo'lsa, menga obuna bo'lib qo'yishni unutmang.

https://www.instagram.com/temursolief/

U yerda ham faol kontent ulashishni boshlayapman. Foydasi tegadi degan umiddaman.

Qo'llab-quvvatlab tursangiz, xursand bo'lardim.

Rahmat oldindan ))

@soliefs

"O‘ylab ko‘ring: shu qiynoq degan narsani oling; bunda azoblar va jarohatlar bo‘ladi, joning og‘riydi, bularning hammasi ruhiy azob chekishga imkon bermaydi, shunday bo‘lgandan keyin to o‘lguningcha badandagi jarohatlarning azobini torta-torta yashab ketasan. Va lekin odamga eng yomon azob beradigan narsa jarohatlarning og‘rig‘i bo‘lmasa kerak, menimcha hozir, mana bir soatdan so‘ng, keyin o‘n daqiqa, so‘ng yarim daqiqa, keyin mana hozir, shu on, shu soniyada muqarrar suratda joning uzilishini, boshqa hech qachon odam bo‘lmasligingni, hammasi endi muqarrar suratda ro‘y berishini bilib turishing qattiq qiynoqqa soladi; hammasidan og‘iri — shu muqarrarlik. Boshingni tig‘ ostiga qo‘yganingdan so‘ng, jodi tepangda shirrillaydi, xuddi shu jodi shirrillagan soniyaning ulushlari hammasidan ham dahshatliroq...

Qotillik qilganligi uchun qatl qilish jinoyatning o‘zidan ko‘ra ham og‘irroq jazo. Hukm o‘qish yo‘li bilan qilinadigan qotillik qaroqchilik yo‘li bilan qilinadigan qotillikdan ko‘ra beqiyos dahshatliroq. Qaroqchilar tomonidan o‘rmondami yo boshqa biron yerda so‘yiladigan odam oxirgi daqiqagacha albatta hali qutulib ketishim mumkin, deb umidvor bo‘ladi. Kekirdagi kesilgan chog‘da ham odam hamon umidini uzmaydi, yalinadi, yolvoradi, qochishga urinadi, shunday voqealar bo‘lgan, bunga misollar bor. Boyagi holda esa odamning o‘lishini o‘n baravar osonlashtiradigan o‘sha so‘nggi umid, ilinjni muqarrar suratda tortib oladilar; buning ustiga hukm deng, hukmning muqarrarligi, undan qochib qutulib bo‘lmasligi hammasidan ham dahshatliroq azob beradi, yorug‘ jahonda bundan ko‘ra qattiqroq qiynoq yo‘q."

FYODOR DOSTOYEVSKIY, TELBA

@soliefs #kitobdanparcha

Biz insonlar juda o'zimizni aldashni yoqtiramiz: o'zimizdagi kamchiliklarni jamiyatning aybiligiga ishonamiz.

@soliefs #qoralama

Xarid-tug'adigan xaridlar

Hech shunday bo'lganmi, yangi narsa olsangiz, boshqa narsalaringiz eskidek yoki arzondek tuyulib ketadi.

Keyin ularni ham yaxshirog'iga o'zgartirgingiz keladi. Garchi o'z funksiyalarini a'lo darajada bajarayotgan bo'lsa-da.

Buni Didero effekti deydi.

18-asrda Fransiyada Denni Didero degan bir faylasuf yashab o'tgan.

Rahmatli akamizga bir kuni qimmatbaho xalat sovg'a qilishadi.

Xalatga qarab, uyidagi narsalar eski yoki arzon ko'rinib qoladi.

Keyin butun uyidagi buyumlarni yangilab tashlaydi va natijada burnidan qarzga botib ketadi.

Ha, aynan burnidan.

Bu haqida o'zi qanday qilib avvalgi buyumlarining egasidan yangi buyumlarining quliga aylangani haqida batafsil yozgan.

Bundan qanday qochish mumkin?

O'zi qochish kerakmi?

Agar yangi xarid sizni buyumlarga egalikdan qulga aylantirayotgan bo'lsa, albatta, ha.

Qutulish uchun dastavval shunday Didero effektiga aldanayotganimizni anglaylik.

Keyin esa buyumlarning funksionalligiga ko'proq e'tibor beraylik.

Ishlayaptimi? Yaxshi ishlayaptimi? Bo'ldi. Almashtirish shartmas.

Yo'qsa, bir xarid boshqa keraksiziga yetaklashi turgan gap.

Sizda ham o'zi shunday holat bo'lib turadimi?

@soliefs

Antimo'rtlik yoxud zarbatoblarlik atamasi Nassim Talebning "Antifragile" kitobidan so'ng mashhur bo'lib ketdi.

Bu yerda menga o'xshagan Nassim Talebni sevib o'qiydigan aka-singillar bor bo'lsa, ajabmas.

Bugun shu antimo'rtlik haqida gaplashamiz va uni hayotimizga qanday tadbiq qilishni o'rganamiz.

Dunyoda kutilmagan qiyinchiliklar va inqirozlar doim bo'lib kelgan. Biz ko'pincha ulardan qochishga harakat qilamiz.

Ha, o'ldirmasa, shu janavarlardan qochishning o'rniga ularni quchoq ochib kutib olsak-chi?!

Axir Nitsshe qalinmo'ylov aytadi-ku, bizni o'ldirmagan narsa kuchliroq qiladi, deb.

Hayotdagi holatlarni uchga bo'lish mumkin.

Birinchisi — mo'rtlik. Masalan, shisha idish. Yerga tushib ketsa, chilparchin bo'ladi.

Faqat bitta maoshga qarab yashaydigan yoki katta qarzga botgan insonning hayoti aynan shunday mo'rt. Kichik moliyaviy inqiroz uni tang ahvolga solib qo'yadi.

Ikkinchisi — chidamlilik. Toshni yerga ursangiz sinmaydi.

Qiyinchiliklarga sabr bilan chidaydigan odamlar xuddi shu toshga o'xshaydi. Ular zarbalarga dosh beradi, lekin foyda ham topmaydi.

Uchinchisi — antimo'rtlik. Bunga misollar talaygina: mushaklarimiz, immunitet tizimi, texnologik innovatsiyalar, madaniyatlar, siyosiy g'oyalar va hatto biz insonlar ham.

Bular tashqi stress hisobiga yanada yaxshilanadi.

Antimo'rtlik — bu inqiroz va qiyinchiliklardan oziqlanib, o'sish degani.

Uni Behalovat avlodning tarjimonlari "zarbatoblarlik" deb ham o'zbekchaga kiritishibdi. Qoyil lekin!

Xo'sh, bu g'oyani amalda qanday ishlatamiz?

Taleb amaki dastavval shtanga qoidasini ilgari suradi.

Moliyaviy va hayotiy qarorlarda o'rtamiyonalikdan qochish kerak.

Masalan, jamg'armangizning katta qismini eng xavfsiz joyda saqlang. Bu, misol uchun, tillaga tikilgan sarmoya bo'lishi mumkin.

Kichik bir qismini esa riski yuqori, ammo daromadi juda katta bo'lishi mumkin bo'lgan g'oyalarga yo'naltiring.

Shunda yo'qotsangiz kam yo'qotasiz, yutsangiz ko'p yutasiz.

O'qishga kelsak, mumtoz adabiyotlardan uzilmang. Vaqt sinovidan o'tgan va hali ham aktual kitoblarni o'qing. Va shu bilan birga, texnik dokumentlar va nish adabiyotlar ham o'qing.

Mana shular 80/20 shtanga strategiyasiga misollar bo'la oladi.

Keyingisi, qomusiylik. O'zingizni bitta tanlovga qamab qo'ymang. Asosiy ishingiz yoniga yana foydali ko'nikmalarni o'rganing.

Buni Hormozi "skill-stacking" deydi. Naval ham buni bozorda boshqalardan ajrab turish uchun maslahat beradi.

Xullas, inqiroz kelib, bitta eshik yopsa, zaxiradagi ko'nikmalaringiz boshqa eshiklarni ochadi.

Yoki sizni alishtirish juda qiyin bo'ladi. Chunki siz faqat bitta emas, bir nechta ko'nikmaga ega asset'ga aylanasiz.

Uchinchisi, Via Negativa. Tizimni yoki umuman hayotni yaxshilash uchun unga doim nimanidir qo'shish shartmas.

Avval sizni orqaga tortayotgan narsalarni olib tashlang. Nosog'lom odatlar, ortiqcha ma'lumotlar va keraksiz qarzlardan voz kechishning o'zi hayotingizni aaaancha yaxshilaydi.

Mikelanjelo ham David haykalini qanday yasagani haqida so'ralganida "Davidga tegishli bo'lmagan qismlarini olib tashladim" deganga o'xshash gap aytgan axir.

Va nihoyat, muntazam kichik stresslar. Qulaylik insonni bo'shashtiradi. Comfort zone kills you deb bejiz aytishmaydi mashoyiqlarimiz.

O'zingizni atayin kichik noqulayliklarga o'rgating.

Zal, yugurish, ro'za, sovuq dush, uzoq soatli chuqur fokus, noma'lumlik darajasi yuqori bo'lgan yerlarga safarlar va hokazo.

Asta-sekin oshirib boriladigan yuklamalar yoki notanish muhit kabi kichik stresslar sizni kelajakdagi haqiqiy zarbalarga tayyorlaydi.

Shunaqa gaplaaar. Bu gaplarni yana bitta qayta o'qib, hayotga tadbiq qilish kerak.

Telegram uchun yozganimga, qisqa-qisqa qilib yozaverdim. Menimcha, bitta boshqa uzun formatda ham olib chiqaman. In shaa Allah.

Xullas, stresslarga ochiqmiz. Noma'lumliklarga ham. Xatolarga ham. Mag'lubiyatlarga ham.

Lekin bu gaplarimdan keyin ulardan yutib chiqmagan kal bo'ladi.

Hammaga antimo'rtlik tilab,

Solief

Aytgancha, postni shunday gaplarni tushunadigan o'rtoqlaringiz bilan bo'lishib tashlang!

@soliefs

Solief,

Biz orqasidan quvayotgan narsalar ko'pincha baxt olib kelmaydi.

Bizga chinakam baxt olib keladiganlarini esa aslida orqasidan quvmaymiz.

Ularni ba'zan payqamaymiz ham.

Bu bahorda daraxtning gullashini ko'rish

Yoki unib chiqqan kurtaklarning kuzda sap-sariq bo'lib to'kilishi.

Yo'l chetidagi ariq suvining sharillab oqishi.

Onang yopgan issiq nonning hidi va ta'mi.

Yomg'irdan keyingi asfaltdan keladigan hid yoki quyosh nurida tovlanadigan kamalak.

Bolali ayolning kolyaskasini zinadan olib chiqishga yordam berib yuborganing.

Yaqinlaring bilan birga ibodatda qoyim bo'lishing.

Ag'anab yotgan ijara samakatini yo'l chetida, foydalanmasang ham, to'g'rilab ketganing.

Yaqin insoningning qo'lini mahkam siqib, uni senga ishonishini his qilganing.

Va ba'zan yiqilganingda tanangning og'rishi ham.

Shular chin baxt beradi.

Shular hayotni yashashga chindan arzirli qiladi.

Faqat oniy lahzada bo'lolsang, bas.

Uni his eta olsang, bas.

Dunyoga ham erishasan.

O'sha tulporlarni ham minasan.

O'sha uylarni ham qurasan.

O'sha qizga ham uylanarsan.

InshaaAllah.

Ammo ular davomli baxt olib kelmaydi.

Davomli baxt qaysidir manzilda emas.

Balki u har doim biz bilan.

Uni his eta olsak, Yaratganga shukr ayta olsak bo'lgani.

Shuning uchun, baxtni quvma; uning o'zi seni topadi deyishsa kerak inglizlar.

Shukronalik esa baxtning darvozasi bo'lsa, ajabmas.

Xullas, baxtli bo'l demayman.

Shunchaki, uni his et.

Eng muhimi, salomat bo'l, my friend.

Aytgancha, Ruh (2020) degan multfilm yaxshi ekan.

Ko'rishni maslahat beraman. 9/10 ⭐️

@soliefs

tushkunlik, halovatsizlik, diqqat kamligi, fikr tarqoqligi, vahimachilik yoki muammolarda pashshadan fil yasash uchrab turibdimi? o'zingizdan qoniqmaslik avjiga chiqyaptimi? to'xtovsiz charchoq bordir? uyquga to'ymayotgandirsiz? munosabatlaringizdan qoniqmayotgandirsiz? balki vaqtingiz hech nimaga yetmayotgandir?

yechimi bor. offlayn yashang. bilaman, deyarli hech kim buni uddalay olmaydi. ammo men oxirgi paytlar shunga qaror qilyapman. behalovat avlod kitobidan keyin onlayn dunyo haqida fikrim tubdan o'zgarib ketdi. hayotimning bu qismini yetarlicha jiddiy olmayotgan ko'rinaman. post joylash uchun kiryapman telegramga ham. ijtimoiy tarmoqlar telefonimda yo'q. bo'lsa ham, o'chirib tashlayapman o'sha kuniyoq.

bu hayot tomosha qilish uchun berilmagan. uni yashash kerak. ekran ortidan dunyoga qarab o'tgandan shu dunyoda chinakamiga yashagan afzalroq.

o'zingizni aldamang.

hammaga sog'liq, halovat va xotirjamlik tilab,

~ Solief

@soliefs

FYODOR DOSTOEVSKIY:

Eng avvalo, o'zingga yolg'on gapirma. O'ziga yolg'on gapirib, o'z yolg'onini tinglayvergan odam oxir-oqibat o'zida ham, atrofida ham haqiqatni ajrata olmay qoladi va shu tariqa o'ziga ham, boshqalarga ham hurmatini yo'qotadi. Hurmatsiz qolgach, sevishdan to'xtaydi, va sevgisiz o'zini band qilish, chalg'itish uchun ehtiroslar va qo'pol lazzatlarga berilib, illatlarida hayvoniylikka tushib ketadi — bularning bari boshqalarga va o'ziga tinimsiz yolg'on gapirishdan kelib chiqadi. O'ziga yolg'on gapiradigan odamni har qanday odamdan ko'ra osonroq xafa qilish mumkin. Bilasanmi, gohida xafa bo'lish juda yoqimli, shunday emasmi? Odam hech kim uni haqorat qilmaganini biladi, lekin o'zi haqoratni o'ylab topgan, uni bo'rttirib, chiroyliroq ko'rsatish uchun yolg'on qo'shgan, bir so'zga yopishib olib, pashshadan fil yasagan — buni o'zi ham biladi, ammo baribir birinchi bo'lib xafa bo'ladi va bu norozilikdan katta zavq topgunicha unga berilib ketaveradi, natijada bu chinakam qasoskorlikka aylanib ketadi.

"Aka-Uka Karamazovlar"dan

Shunday deb bilgan odamlaringizga yuborib qo'ying.

@soliefs

shumi zamonaviylik?

- soatlab gadjet titish va "brainrotting" (=miyani chiritish)

- uxlash uchun ham kiyib bo'lmaydigan kiyimni jamoat joyida kiyish

- uy yoki atrofimdan emas, balki internetdan qahramon qidirish

- mulaqotlar onlayn va kayfiyatni emojilar belgilasa

- inson qadri yig'gan "layklarining" soniga chambarchas bog'liq bo'lsa

- yegan 4ta yeguligimizdan kamida 2tasi "himikat" bo'lsa

- yashillikni tobora yeb borayotgan beton "mashinalar"

- iste'molidan "musor"i ko'p xaridlar

men bu poyezddan shu yerda tushib qolsam, iltimos

@soliefs

O'tgan shanba dachada jamoaviy yig'indan keyin hayking qildik.

Kichik Chimyonga. O'sha kuni eng issiq kun bo'lishi kutilayotgandi.

Ertalab chiqib ketdik. 1 soatdan biroz ko'proq chiqishga va qaytishga taxminan 25-30 minut ketdi.

Kichik Chimyonni zabt etdik.

O'zimga chellenj qilib, tezroq chiqishga va irodamni sinab ko'rishga harakat qildim.

Kelasi safar unday qilmayman lekin. Chiqishdagi suhbatlardan mosuvo bo'ldim.

Cho'qqiga birinchi marta chiqishim edi. Zo'r tajriba bo'ldi.

Tafakkur qilishga zo'r mashg'ulot ekan.

Bir kun avval uxlamaganim pand berdi. Tikroq joylariga kelganda charchab qoldim.

Ammo umumiy olganda, charchab mazza qildim.

Yana hayking bo'lsa, yo'q demayman.

Tog' cho'qqisiga hayking: 10/10

@soliefs