Azattyq - Азаттық

🇰🇿Азия ойындарындағы қазіргі нәтиже қандай?

🔹Жалпы есеп

Жапонияда өтіп жатқан Азия ойындарында Қазақстан қазірше 9 алтын, 19 күміс, 36 қола медальмен жалпы есепте 9-орында келеді. Қазақстан қазір жалпы есепте Өзбекстан (16 алтын), Иран (11 алтын), Таиланд (12 алтын), Бахрейн (11 алтын), Үндістан (11 алтын) озып тұр. Ал алғашқы үштіктегі Қытай (154), Жапония (59), Оңтүстік Корея (30) басқа елдерден ұзап кетті.

🔹1 қазандағы нәтиже

Бүгін, 1 қазанда Қазақстан 3 күміс, 5 қола медаль алды.

Дзюдошылар Ажар Асқат (әйелдер, 70 кг) пен Әділет Алмат (ерлер, 81 кг) финалда жапон балуандарына жол берді. Ал джи-джитсудан Нұржан Батырбеков (ерлер, 69 кг) финалда БАӘ спортшысынан ұтылды.

Дзюдошы Эсмигүл Куюлова (әйелдер, 63 кг), джи-джитсудан Жібек Құлымбетова (48 кг), слалом есуден Екатерина Таранцева, жарға өрмелеуден Дамир Тоқтаров, теннистен әйелдер арасындағы жекелей жарыста Юлия Путинцева қола медаль иеленді.

🔹Алтынға кімдер үмітті?

Ертең, 2 қазанда бокстан Айбек Оралбай (+90 кг) мен Төрехан Сабырхан (70 кг) алтын медальға таласады. Бұған қоса, көркем гимнастикадан Ақмарал Ерекешова іріктеуде бірінші орынмен финалға шықты. Бұған қоса, еркін күрес, дзюдо, таэквондо, теннис, джи-джитсудан жарыстар жалғасып жатыр. Су добынан Қазақстан ерлер құрамасы жартылай финалда Қытаймен ойнайды.

🔹Қазақстанның тоғыз алтынын кімдер алды?

🥇Алексей Луценко – велоспорт, ерлер, жекелей жарыс
🥇Алексей Луценко – велоспорт, ерлер, топтық жарыс
🥇Рината Сұлтанова – велоспорт, әйелдер, топтық жарыс
🥇Софья Берульцева – каратэ
🥇Жоламан Биғабыл – каратэ
🥇Қадырбек Шынбаев – ММА
🥇Еркінқали Бүркіталин – ММА
🥇Владислав Яковлев/Иван Чернухин – академиялық есу
🥇Семсерлесуден Қазақстан ерлер құрамасы (шпага)

✈️ Fly Dubai ұшағындағы жағдай: Жолаушылар шабуылдаған пилотты қалай тоқтатқан? Куәгерлер не дейді?

Израиль тергеуінің дерегінше, Дубайдан Тель-Авивке келе жатқан Fly Dubai рейсінің пилоты бортты жерге құлатпақ болған. Ұшқыш ұшақты өз басқаруына алу үшін борт капитанына шабуылдаған. Жараланған капитан кабина есігін ашып үлгерген. Кейін бірнеше жолаушы кабинаға кіріп, екінші пилотты тоқтатқан. Жолаушылардың бірі Асаф Раджуан "ұшақ кенет төмендей бастаған соң кабинаға кіреміз деген шешім қабылдадық" деген.

Басылымдардың жазуынша, зардап шеккен командир – үндістандық Сумит Мачхар. Шабуылдаған пилотты тоқтатқан соң бортта болған басқа екі пилот ұшақты Сауд Арабиясының Табук қаласына қондырған.

🔹Ұшақ жолаушыларының айтқаны

Пилоттар кабинасына алғаш кірген Янив Хайонның айтуынша, жараланған пилот іштен есікті ашуға көмектескен. Хайон басқа жолаушылармен шабуылдаған пилотты кабинадан шығарып, байлап тастаған. Кейін ол кабинаға оралып, ылдилап бара жатқан ұшақты қалпына келтірген. Борт қалпына келген соң жолаушылар арасында болған екі пилот ұшақты басқаруды өз қолына алған. Мамандығы сантехник Хайон ұшақ басқару алгоритмін "Әуе апаттарын зерттеу" сериалынан білетінін айтқан.

🔹Сауд Арабиясы мен Израильдің байланысы

Ұшақ сигнал берген сәттен бастап Израильдің "Моссад" ішкі барлау қызметі мен Сауд Арабиясының барлау қызметі байланыста болғаны айтылады. Бірақ Сауд Арабиясы Израильдің жолаушыларды эвакуациялауға жіберген С-130 Hercules әскери-жүк ұшағын ел аумағына қондыруға рұқсат етпеген. Израиль мен Сауд Арабиясы арасында дипломатиялық қарым-қатынас жоқ. Бірақ 2023 жылдың қазанынан бері Сауд Арабиясы Израильге баратын Fly Dubai ұшағын әуе кеңістігін пайдалануға рұқсат еткен.

"Вести" басылымының израильдік дереккөзі бұл оқиға екі ел арасындағы бейресми қатынас үшін ерекше жағдай болды деген. Себебі Израильдің ондаған азаматы бірнеше сағат бойы Сауд Арабиясының әуежайында отырып, оларға жергілікті билік көмектескен.

"Қазақстан жемқорлыққа қарсы ұсыныстардың басым бөлігін әлі толық орындаған жоқ". GRECO есебі шықты 📄

Қазақстан жемқорлыққа қарсы күрес саласында бірқатар заңнамалық және институционалдық өзгеріс жасағанымен, халықаралық GRECO тобы осыған дейін айтылған ұсыныстардың басым бөлігін әлі толық орындамаған деп есептейді. Қазақстанға арналған 27 ұсыныстың тек алтауы ғана қанағаттанарлық деңгейде, 19-ы ішінара орындалған. Ал екі ұсыныс мүлде орындалмаған дейді есеп авторлары. ⚖️

Есеп Еуропа кеңесінің Сыбайлас жемқорлыққа қарсы мемлекеттер тобы – GRECO ұйымы Қазақстанға арналған ұсыныстардың орындалуын тексереді. Алдыңғы есепте Қазақстан төрт ұсынысты орындады, 21 ұсынысты ішінара орындады, ал екі ұсынысты орындамады деп көрсетілген еді.

Толығырақ оқыңыз 🔗

Дубайдан Израильге ұшқан Flydubai ұшағында күтпеген жағдай болды. Екінші пилот әріптесіне пышақ сұғып, ұшақты құлатпақ болды күдікке ілінді.

Шабуыл кезінде ұшақ жарты минутқа жетпейтін уақытта шамамен 4 мың 300 метрге төмендеген. Ауыр жараланған негізгі пилот, Үндістан азаматы Смит Маччхар кабина есігін ашатын тетікті басып үлгерген. Осыдан кейін жолаушылар мен экипаж мүшелері шабуылдаған пилотты тоқтатқан. Бортта жолаушы ретінде отырған екі ұшқыш ұшақты Сауд Арабиясының Табук қаласына аман-есен қондырған.

Адам өлтіргені үшін өлім жазасына кесілген 50 жастағы америкалық Криста Пайкқа адам өмірін тоқтататын екі рет инъекция салса да, тірі қалды.

Ол ауруханаға жеткізілді деп хабарлады Associated Press. Пайк Теннеси штатында кейінгі 200 жылда өлім жазасына келген алғашқы әйел болуы керек болған.

Өлім жазасының орындалуына бір сағат қалғанда АҚШ апелляциялық соты өлім жазасының орындалуын тоқтатқан. Сот Пайкқа үкім шығарылар кезде "оның бала кезде жыныстық зорлыққа ұшырағаны тиісті дәрежеде ескерілді ме" деген сұрақты тағы да зерттеуді үкім еткен, алайда бірнеше сағаттан соң АҚШ Жоғарғы соты шешімнің күшін жойды. Осылайша өлім жазасы үкімі қайта қалпына келді.

Теннеси штатының түзеу мекемесі департаменті “өлім жазасын орындау туралы хаттаманың әрбір кезеңін” жүзеге асырған. Бірақ хаттамада тұтқын тірі қалған жағдайда не болатыны жазылмаған.

Штат губернаторы Билл Ли биылға белгіленген барлық өлім жазасын тоқтатып, Пайкқа үкімді орындау кезінде “нақты не болғанын анықтау үшін” жан-жақты тәуелсіз тексеріс жүргізуді қаулы етті.

1995 жылы 18 жастағы Пайк пен оның серігі Тадарил Шипп Коллин Слеммерді өлтірген. Қатігездікпен адам өлтірді деп танылған Пайк өлім жазасына кесілді. Сол кезде 17-де болған оның серігі Шипп өмірлік түрмеге кесілді. Сот үкімі шыққаннан кейін Пайкқа бұрын өгей әкесі күш көрсеткені, екі рет зорланғаны белгілі болды. Оған жарақаттан кейінгі стресс және биполярлық ауытқу деген диагноз қойылған.

БҰҰ бас хатшылығына ықтимал үміткерлер қатарында Тоқаев та аталды

БҰҰ бас хатшылығынан үміткерлерді іріктеу кезеңі “сәтсіз” аяқталғаннан кейін жаңа ықтимал кандидаттардың аты атала басталды, арасында Қасым-Жомарт Тоқаев та бар. Британдық Guardian басылымы 21 қыркүйек күнгі мақаласында үш жабық дауыс беру айқын жеңімпазды анықтай алмағанын жазды. Дегенмен үш кандидаттың “әлі де мүмкіндігі” бар.

БҰҰ-дағы тығырық тұсында одан да өзге ықтимал үміткерлердің аты аталып жатыр, арасында Қазақстан басшысы Қасым-Жомарт Тоқаев, БАӘ сыртқы істер министрі Лана Нусейбе, Венгрияның бұрынғы премьері Виктор Орбан да бар. Бірақ бұлардың ешқайсысы ресми түрде өтініш бермеген.

Үміткерді БҰҰ Қауіпсіздік кеңесіне мүше 15 елдің кемінде 9-ы қолдауы керек және кеңестің тұрақты бес мүшесі – Франция, Ұлыбритания, Қытай, Ресей немесе АҚШ ешқайсысы қарсы болмауы керек. Кеңестің тұрақты мүшелері арасында ымыраға келу терең саяси қайшылықтарға байланысты қиын болып барады деп жазды басылым.

Қазақстанда "Тоқаев БҰҰ Бас хатшысы қызметіне кандидат болуы ықтимал" деген болжамдар біраздан бері айтылып жүр. Бірқатар сарапшы биыл наурызда жаңа Конституцияның жедел қабылданғаны, жаңадан вице-президент лауазымы енгізілуі билік транзитіне дайындық болуы мүмкін деп топшылаған.

13 наурызда Reuters агенттігі "қазақстандық дипломаттар ортасындағы дереккөзге" сүйеніп, Тоқаев "өз кандидатурасын Бас хатшы лауазымына ұсыну мүмкіндігін қарастырып жатқанын" хабарлаған.

Алайда Тоқаев бұған дейін "БҰҰ-ға бармайтынын" кемі екі рет айтқан. Биыл қаңтарда "Түркістан" басылымына берген сұхбатында "ұсыныстарға қарамастан, Біріккен ұлттар ұйымындағы жұмысқа қайта оралатын ниетім жоқ" деп мәлімдеді. 2025 жылғы 3 қаңтарда "Ана тілі" газетіне берген сұхбатында Тоқаев "Женевадағы тәжірибем маған жетеді" деген.

Биыл тамызда Тоқаев алда президент сайлауына түсу-түспеуге қатысты нақты жауапты 2027 жылы айтамын деді.

💬 Орталық Азияның төрт мемлекеті Ресей және Беларусьпен "экстремистер" туралы мәлімет алмасуға келісті

Ресей, Беларусь, Қазақстан, Қырғызстан, Тәжікстан және Өзбекстанның бас прокурорлары терроризм мен экстремизмге қарсы күрес саласында ынтымақтастық туралы келісімге қол қойды. Құжатқа 30 қыркүйекте Қазан қаласында ТМД елдері бас прокурорларының үйлестіру кеңесінің отырысында қол қойылды.

Келісім осы елдерде террористік немесе экстремистік деп танылған және биліктің айтуынша, қауіпсіздікке қатер төндіретін ұйымдар, топтар және жеке тұлғалар туралы «жедел ақпарат алмасуды» қарастырады. Бұған қоса, аталған елдер мұндай топтардың халықаралық байланысы, ықтимал террористік шабуыл және «мемлекеттердің егемендігіне қол сұғу» жөнінде ақпарат алмасуға келісті.

"Экстремизм" ұғымы аталған елдерде тек қарулы топтар мен радикал топтарға емес, өзге де азаматтарға қатысты атап айтқанда, оппозициялық қозғалыстар, тәуелсіз медиа, саяси белсенділер мен билік сыншыларына қатысты да қолданылады.

Оңтүстік Кореяда құрылыс алаңында қазақстандық қаза болды

Ақпаратты Қазақстан сыртқы істер министрлігі растады. Оңтүстік Кореяның ақпарат құралдарының жазуынша, оқиға 29 қыркүйекте болған. Ер адам ғимараттың 23-қабатында болған, бетоннан жасалған төбенің бір жағы құлаған.

Осы оқиғадан кейін Оңтүстік Кореяның еңбек министрлігі құрылыс нысанындағы жұмысты тоқтатты.

Қазақстандық дипломаттар марқұмның туыстарына хабарласқан, тиісті көмек беріп жатқаны хабарланды. Оқиғаның мән-жайын Кореяның органдары анықтап жатыр.

Былтыр күздегі ресми мәлімет бойынша, Оңтүстік Кореяда шамамен 15 мың қазақстандық жұмыс істейді.

Өмір сүру ұзарды. Қазақстан демографиялық қартаю жолына түсті ме?

Ресми статистика Қазақстанда өмір сүру жасы артқанын көрсетіп отыр. Яғни, жұрт ұзақ жасай бастаған. Бірақ сонымен бірге қарттар үлесі де ұлғайып келеді. Мұны ғылымда демографиялық қартаю дейді. Қазақстан бұған дайын ба? Қарттықтың сапасы қандай?

👉Толығырақ оқыңыз
📹YouTube-тан көріңіз

Ресей Украина дрон күштерінің командирі Роберт «Мадяр» Бровдиді ұстаған адамға 20 млн доллар тағайындағаны жайлы айтылды. Ресей миллиондаған доллар тіккен Бровди кім?

Бір күнде үш дрон Молдованың әуе кеңістігін бұзды

30 қыркүйекте таңертең Молдова полициясы ел аумағына дрон кіргенін хабарлады. Ведомствоның дерегінше, дрон сағат 5:40-та байқалған, ізінше Анений-Ной аумағына құлады.

Сәрсенбі күні Молдова қорғаныс министрлігі тағы бір реактивті дрон жөнінде хабарлады. Ол елдің шығыс бөлігіне – мойындалмаған Приднестровье арқылы кірген. Қорғаныс министрі Анатолий Носатыйдың айтуынша, бұл 84-жағдай.

“Ресей Федерациясы азаматтарымыздың өмірін қатерге тігіп отыр, [Днестрдің] қай жағында тұрса да, қай тілде сөйлесе де” деді Носатый.

Сәрсенбі күні кешке қарай билік елдің әуе кеңістігінде тағы бір дрон пайда болғанын хабарлады. Қорғаныс министрлігінің айтуынша, Ресей Украинаы атқылап жатқан тұста дрон Молдова шекарасын кесіп өткен. Осыдан кейін билік ел әуе кеңістігінің орталық бөлігін уақытша жапты.

⚡Израиль Fly Dubai ұшағындағы жағдайды "жихадшылардың террорлық шабуылы" деді

Израиль қорғаныс министрі Исраэль Кац Дубайдан Тель-Авивке ұшып келе жатқан Fly Dubai ұшағындағы жағдайды «жихадистердің террорлық шабуылы» деп атады.

"Fly Dubai ұшағындағы жағдай жихад терактіге талпыныс болды. Ұшқыштар кабинасына кіріп, террористі тоқтатып, ұшақтың басқаруын басқа пилоттарға алып берген израильдік бірнеше жолаушының әрекеті апатты алдын алды. Шабуылдаушының мақсаты ұшақты жолаушыларымен құлату болған" деді Кац.

Израиль премьері Беньямин Нетаньяху Сауд Арабиясының билігі ұшқышты қамауға алып, тергеп жатыр деп мәлімдеді.

🔹Оқиға жайлы не белгілі?

Бүгін, 30 қыркүйекте Fly Dubai компаниясының Дубайдан Тель-Авивке шыққан ұшағы 7500 дабылын қаққан. Әдетте 7500 кодымен сигнал ұшақты басып алғанда я бұрып әкеткенде беріледі. Reuters агенттігі дереккөздеріне сілтеп, ұшақта ұшқыштар төбелескенін жазды. Ұшақ Сауд Арабиясының Табук қаласына қонған. Ақпарат бойынша, ұшақты бортта болған басқа ұшқыштар басқаруға алып қондырған.

Fly Dubai компаниясы бортта ұшқыштар төбелескенін, ұшақты басқаруды басқа пилоттар қолға алғанын растады.

АҚШ Ирактан әскерін тұтас әкетеді

Америка әскерінің соңғы легі – 2500 сарбаз сәрсенбі, 30 қыркүйек кешке дейін Ирактан кетеді. Мұндай шешімді 2024 жылы АҚШ президенті Джо Байден қабылдаған.

Пентагон жариялаған мәлімдемеде АҚШ-тың Иракта «Ислам мемлекеті» террористік тобымен (ДАИШ) күрес бойынша әскери миссиясы сәтті аяқталғаны жазылған. АҚШ қорғаныс министрлігі де Ирак қауіпсіздік күштері ДАИШ жақтастарымен күресті жалғастыратынына үміт білдірді. АҚШ Бағдадпен ынтымақтастық орнатуға, Ирак әскерін жаттықтыруға және олармен барлау ақпараттарымен бөлісуге уәде берді.

Ирак билігі әскердің шығарылуына орай төрт күн бойы «Тәуелсіздік күндерін» атап өтпек. Ирак премьер-министрі Әли әл-Зейд «1 қазан Ирак мемлекетінің жаңа бағытқа бұрылып, шетел әскерінен құтылып, толық егемендікке қол жеткізетін күні болады» деп мәлімдеді.

Кейбір саясаттанушылар АҚШ кетсе, елде қарулы топтар қайта бас көтеруі мүмкін деп алаңдайды.

АҚШ мемлекеттік департаментінің жетекшісі Марко Рубио 24 қыркүйекте БҰҰ Бас ассамблеясы кезінде Бағдад елдегі қарулы топтарды, соның ішінде Иран қолдайтын топтарды бақылауда ұстай алмаса, Иракқа бөлшектену қаупі төнеді деді.

Каспий теңізіндегі апат: “желіде сыни пікір жазғандарға полиция хабарласты” деген ақпаратты ІІМ жоққа шығарды

“Ақпаратты растамаймыз. Полиция қызметкерлері қоңырау шалған жоқ. Күшейтілген тәртіпте қызметтерін атқарған ішкі істер қызметкерлері Маңғыстау облысында қоғам қауіпсіздігін тиісті дәрежеде қамтамасыз етті. Қазіргі кезде елде жағдай тұрақты” деді 30 қыркүйекте журналистердің сұрағына жауап берген ішкі істер вице-министрі Санжар Әділов.

Каспий теңізіндегі апаттан 14 сарбаздың қазасынан соң желіде сыни пікір жазғандардың біразы "полиция хабарласқан соң пікірлерін өшіргенін" айтқан еді.

NYT: A7 компаниясы Ресейге санкцияны Қырғызстан арқылы да айналып өтуіне көмектеседі

Ресейлік A7 компаниясы "ақшаны жылыстату үшін" жалған компаниялар мен криптовалюталарды қолданды, Мәскеу ауқымды санкцияны Қырғызстан арқылы да айналып өту үшін сауда құжатнамасын бұрмалады, деп жазды америкалық New York Times газеті.

Басылымның мәліметінше, 2025 жылдың алғашқы төрт айында A7 компаниясы санкция шектеуіне ілінген құны жарты миллиард доллардан асатын қаржылық операция жасаған. New York Times журналистері A7-ге қатысты компаниялар Қырғызстандағы банктерден алты шот ашып, 100 млн долларға дейін транзакция жасаған.

🇰🇿Сметов – Азия ойындарының күміс жүлдегері

Жапонияда өтіп жатқан Азия ойындарында дзюдодан қазақстандық Елдос Сметов 60 келіде күміс жүлде иеленді. Ол финалда жапон Хайото Кондодан жеңілді.

34 жастағы Сметов бұл Азия ойындарында финалға дейін оңтүстік кореялық Ли Харимнен, моңғолиялық Аринболд Енхтейвентен, тайваньдық Юнг Вей Янгтен басым түскен.

2024 жылы Париж олимпиадасында чемпион атанған Сметов осымен екінші рет Азия ойындарында жүлде алып отыр. Ол 2014 жылғы Азиадада чемпион атанған. 2015 жылы әлем чемпионатында топ жарған. 2016 жылы Азия чемпионы атанған. Бұған қоса, Рио олимпиадасының күміс, Токио олимпиадасының қола жүлдегері.

Фото: Қазақстан ұлттық олимпиада комитеті

Тоқаев Путинді "оңтайлы қайраткер" деп атап, Украинаға "зор құрметпен қарайтынын" айтты

Қазақстан президенті Қасым-Жомарт Тоқаев Владимир Путинді "көрнекті мемлекет қайраткері" және Ресей басшылығына "ең оңтайлы саяси тұлға" деп сипаттады. Бұған қоса ол "Украина халқына, оның тарихына, мәдениеті мен дәстүріне, тіліне зор құрметпен қарайтынын" айтып, соғысты уақытша доғаруға шақырды.

Германиялық ARD телеарнасының тілшісі Демиан фон Остен Тоқаевқа оның биыл жазда Омбыда Путинмен кездескенде Украинадағы соғысты уақытша тоқтату жайлы айтқан ұсынысын еске салып, "содан бері соғыстағы жағдай өзгермеді, қазір осы жайлы оған не айтар едіңіз?" деп сұрады.

"Бұл мәселе бойынша жеке позициямды зор түсіністікпен қабылдағаны үшін президент Путинге ырзамын. Өйткені біздің бәріміз, мемлекеттер жетекшілері, оның ішінде Ресей президенті де бар, Украинадағы соғыс қимылдары тоқтағанын қалаймыз" деді Тоқаев неміс тілшісіне орыс тілінде берген жауабында.

👉Толығырақ оқыңыз

Дзюдошы Әбужақынова - Азиаданың күміс жүлдегері

Жапонияда өтіп жатқан Азия ойындарында дзюдодан қазақстандық Абиба Әбужақынова 48 келіде күміс медаль алды. Ол финалда жапон Митсуки Кондодан жеңілді.

Қазақ дзюдошысы Азия ойындарында финалға дейін үндістандық Асмита Дей мен тайваньдық Чен-Хао Линді жеңген.

Әбужақынова 2022 жылғы Азия ойындарында күміс медаль иеленген еді. Ал 2025 жылы әлем чемпионатында да екінші орын алған.

Фото: Қазақстанның ұлттық олимпиада комитеті

Дубайдан Тель-Авивке қарай ұшқан ұшақ апат белгісін берді

Дубайдан Тель-Авивке ұшқан жолаушылар ұшағы әуеде апат белгісін беріп, Сауд Арабиясы төбесінен бұрылған, оның ұшуы жөнінде ақпарат мониторингтік сайттарда көрінбей қалған. Ақпарат құралдарының жазуынша, бортта Ресей және Украина ұшқыштары төбелесіп қалған.

Израильдің 12-арнасының хабарлауынша, ұшқыштар “сыртқы интервенция” жөнінде сигнал берген, бұл ұшақты басып алғандығынан хабар беруі мүмкін.

Израиль ақпарат құралдарының жазуынша, Израиль жойғыш ұшағы әуеге көтерілген, ал премьер-министр Биньямин Нетаньяху шұғыл жиналысқа шақырды.

Кейін Израильдің ақпарат құралдары бортында 174 жолаушы болған ұшақ Сауд Арабиясына қонғанын, штаттан тыс жағдайға “ұшқыштар арасындағы төбелес” себеп болуы мүмкін деп жазды. CNN де дереккөздерге сүйеніп, ұшқыштар арасындағы “күш қолдану” туралы хабарлады. Әзірге, ақпарат ресми түрде расталмады.

Жеті жасар Раяна Қытайға қайтарылуы мүмкін бе? Қытайда туған Раяна қазір Қазақстанда әке-шешесімен бірге тұрады, бірақ құжат бойынша олардың баласы емес. Оның туу туралы куәлігінде туыстарының аты жазылған, ал отбасы ДНҚ сараптамасы арқылы Раянаның өз қыздары екенін дәлелдеуге тырысып жүр. Осы мәселе шешілмегендіктен, бүлдіршін Қазақстан азаматтығын ала алмай отыр.