Kiber olam

GTA VI o‘yinining reliz treyleri e’lon qilindi

GTA VI o‘yinining chiqarilishiga hali bir oydan ko‘proq vaqt qolgan bo‘lsa-da, Rockstar Games allaqachon uning reliz treylerini e’lon qildi.

Studiya treyler uchun o‘yin jarayoni PlayStation 5 konsolining standart versiyasida yozib olinganini ma’lum qildi. Biroq PS5 Pro uchun mo‘ljallangan grafik yaxshilanishlar haqida hech qanday ma’lumot berilmadi.

Eslatib o‘tamiz, GTA VI 19-noyabr kuni faqat PlayStation 5 va Xbox Series X|S konsollari uchun chiqariladi.

Huawei Mate XT 2 Ultimate Design Xitoydan tashqarida ham sotuvga chiqadi

Huawei kompaniyasi yangi uch buklanadigan smartfonini global bozorda taqdim etishini tasdiqladi. Avvalroq faqat Xitoy bozori uchun e’lon qilingan qurilmaning xalqaro taqdimot sanasi hozircha ma’lum emas.

Huawei kompaniyasidan Richard Yu ma’lum qilishicha, kompaniya smartfonni Yaqin Sharq va Osiyo-Tinch okeani mintaqasi bozorlariga olib chiqishni rejalashtirmoqda. Keyinchalik ushbu model Yevropada ham paydo bo‘lishi mumkin.

Forza Horizon 6 PS5 uchun 2027-yil yanvarida chiqadi

Premium nashr egalari o‘yinni 2027-yil 21-yanvardan, qolgan o‘yinchilar esa 2027-yil 26-yanvardan boshlab o‘ynashlari mumkin.

Oldindan buyurtma berish imkoniyati yaqin vaqt ichida ochiladi.

Apple tasma bo‘ylab elektronika joylashtirilgan fitnes-brasletni patentladi

Apple kompaniyasining yangi patent arizasida asosiy komponentlari bitta soat korpusida emas, balki butun braslet tasmasi bo‘ylab taqsimlangan taqiladigan qurilma tasvirlangan.

Protsessor, akkumulyator, xotira, aloqa modullari va sensorlar tasmaning alohida qismlariga joylashtiriladi. Bu qurilmani yanada yupqaroq qilish va sensorlarni aniqroq joylashtirish imkonini beradi. Patentda elektr yo‘llari, antennalar hamda quvvatlash kontaktlaridan foydalanish ham ko‘zda tutilgan.

Apple yurak urishi, EKG, harorat, akselerometr va giroskop sensorlarini tilga olgan. Ularni brasletning turli tomonlariga joylashtirish yoki yirik qon tomirlariga yaqinroq o‘rnatish mumkin. Haroratni esa bir nechta nuqtada, jumladan, tana va atrof-muhit haroratini o‘lchash rejalashtirilgan.

Alohida modullar suv va changdan himoyalanishi mumkin. Apple ikkita tasma ishlatiladigan konstruksiyani, shuningdek, elektronikaning bir qismini kiyimga o‘rnatish imkoniyatini ham ko‘rib chiqmoqda.

Bundan tashqari, tasmaning ayrim qismlarida displey, dinamik yoki vibratsion javob funksiyasi bo‘lishi mumkin. Demak, Apple konsepsiyasi butunlay ekransiz fitnes-braslet bilan cheklanmaydi.

HP OmniBook 5 14 noutbukini taqdim etdi

Model 300 nit yorqinlik va 1920×1200 piksel ruxsatga ega 14 dyuymli sensorli OLED displey bilan jihozlangan.

Noutbuk ichida Intel Core 5 320 protsessori hamda 8+256/512 GB xotira mavjud.

Akkumulyator sig‘imi 60 Vt·soatni tashkil etadi. Kompaniya ma’lumotlariga ko‘ra, bu video tomosha qilishda 42 soatgacha avtonom ishlash imkonini beradi. Portlar orasida ikkita USB-C, HDMI 2.1 va 3,5 mm audio uyasi bor.

Korpus alyuminiydan tayyorlangan, qalinligi atigi 11,7 mm. Noutbukning og‘irligi esa 1,16 kg.

HP OmniBook 5 14 allaqachon sotuvga chiqdi. Narxi 699 dollardan boshlanadi.

Apple kodidan iPad 12 xususiyatlari aniqlandi

MacRumors nashri Aaron Perris tomonidan Apple kompaniyasining nomi oshkor qilinmagan ilovasi kodidan topilgan ma’lumotlarga tayanib xabar berishicha, iPad 12 A19 chipi, 8 GB tezkor xotira, C1X modem va N1 tarmoq chipi bilan jihozlanadi.

A16 chipidan A19 chipiga o‘tish planshet unumdorligini oshirishi, shuningdek, Apple Intelligence va Siri AI funksiyalaridan foydalanish imkonini berishi kutilmoqda. Tezkor xotira hajmi ham 6 GB dan 8 GB gacha oshadi.

N1 chipi esa qurilmaga Wi-Fi 7, Bluetooth 6 va Thread standartlarini qo‘llab-quvvatlash imkonini beradi.

Yangi iPad taqdimoti 2027-yil bahoridan oldin kutilmayapti. Boshlang‘ich narx esa, ehtimol, hozirgidek 449 dollar darajasida qoladi.

PlayStation 5 konsolini yangi buzib kirish usuli paydo bo‘ldi

X tarmog’idagi Gaming nomli insayder @manfightdragon ma’lumotlariga tayanib yozishicha, yangi jailbreak PS5 va PS5 Pro qurilmalaridagi tizim cheklovlarini chetlab o‘tadi. U taxminan so‘nggi bir hafta ichida yangilangan konsollardan tashqari, deyarli barcha qurilmalarda ishlaydi.

MODDED WARFARE ma’lumotlariga ko‘ra, yangi Relapse jailbreak 7.00 dan 13.60 gacha bo‘lgan proshivka versiyalaridagi PS5 konsollarida ishlaydi va bir necha soniya ichida ishga tushadi.

Biroq bunday buzib kirish usulidan foydalanish xavfli. U PSN akkauntining bloklanishi, konsolda nosozliklar va boshqa muammolarga olib kelishi mumkin.

Apple Apple Music xizmatini sezilarli darajada o‘zgartirmoqda (gap faqat logotip haqida emas)

Yaqinda Apple Londondagi mashhur lokatsiyada o‘zining Apple Music Hall nomli konsert zalini ochdi. Bu joyni ko‘pchilik Pink Floyd guruhining albomlaridan birining muqovasidan tanishi mumkin.

Xuddi shu kuni kompaniya servis logotipini ham o‘zgartirib, uni yanada qalin va ko‘zga tashlanadigan ko‘rinishga keltirdi.

Ammo bu hali boshlanishi.

Apple Apple Music Hall’da chiqish qiladigan ilk san’atkorlar ro‘yxatini e’lon qildi. Barcha konsertlar Apple Music servisida jonli efirda namoyish etiladi.

Bundan tashqari, kompaniya 10–11-oktabr kunlari elektron musiqa festivali — Head Trip’ni ham translyatsiya qiladi.

Endi oktabr oyida kutilayotgan yangi Apple TV 4K taqdimoti ham boshqacha ma’no kasb etmoqda. Axir konsertlarni maksimal sifatda tasvir va eng yuqori darajadagi ovoz bilan tomosha qilishni qaysi qurilmada birlashtirish mumkin?

Taxminlarga ko‘ra, yangi Apple TV 4K va yangi HomePod kolonkalarining taqdimoti oktabr oyining dastlabki kunlarida yoki hatto yaqin kunlarda bo‘lib o‘tishi mumkin.

Yangi HomePod modellari Siri AI’ni qo‘llab-quvvatlaydi

Kod tadqiqotchisi pdfu HomePod Software 27 ichida Siri AI’ning ishlashiga asos bo‘ladigan Linwood tizimini, shuningdek, yordamchi ranglaridagi yorug‘lik indikatorlarini aniqladi.

Ushbu funksiya hozirgi HomePod modellarida ishlamagani sababli, uning qo‘llab-quvvatlanishi kelajakdagi qurilmalar bilan cheklanishi mumkin. Mish-mishlarga ko‘ra, yangilangan HomePod mini yanada tezkor S9 yoki undan yangi chip bilan jihozlanadi.

Qurilmaning dizayni yangilanmasligi kutilmoqda, biroq Apple unga N1 tarmoq chipi, yangiroq Ultra Wideband texnologiyasi va qo‘shimcha rang variantlarini qo‘shishi mumkin.

Taxminlarga ko‘ra, qurilma Siri AI va Apple Intelligence’ning ayrim funksiyalaridan mos keluvchi iPhone orqali foydalanadi. Bu mexanizm Apple Watch Series 9 va undan keyingi modellardagi ishlash tamoyiliga o‘xshash bo‘lishi mumkin.

PlayStation 6 va XBOX Helix 2027-yil oxirida chiqadi

Insayder Kepler_L2 ma’lum qilishicha, PlayStation 6 va XBOX Helix uchun mo‘ljallangan chiplar ishlab chiqarishdan oldingi yakuniy bosqichda.

Agar bu ma’lumot tasdiqlansa, konsollar dastlab rejalashtirilganidek, 2027-yil oxirida taqdim etiladi.

Shuningdek, u PS6 grafik unumdorligi 40 teraflops, XBOX Helix esa 56 teraflopsni tashkil etishini tasdiqlagan.

Bunday farq FPS soniga katta ta’sir qilmaydi, biroq tasvir aniqligi va “ray tracing” sifatida sezilarli bo‘lishi mumkin.

Biroq konsollarning asosiy muammosi ularning narxi bo‘lishi mumkin. Hozirda PS6 uchun ehtiyot qismlarning tannarxi taxminan 960 dollar, Helix uchun esa 1200 dollar atrofida baholanmoqda.

Shu bilan birga, Microsoft o‘z platformasida uchinchi tomon do‘konlariga kirishni ochishni rejalashtirmoqda. Bu esa avvalgidek qurilmalarni zarariga sotish imkoniyatini deyarli istisno qiladi.

Internetda Samsung Galaxy Tab S12+ va S12 Ultra xususiyatlari paydo bo’ldi

Galaxy Tab S12+ va S12 Ultra katta o‘zgarishlarga ega bo‘lmaydi — ikkala modelda ham batareya sig‘imi oshiriladi va MediaTek Dimensity 9500 chipi o‘rnatiladi.

Har ikkala qurilma ham Android 17 operatsion tizimida, One UI 9 brend qobig‘i bilan ishlaydi.

Samsung’ning yangi planshetlarini rasmiy taqdimoti 7-oktabr kuni bo‘lib o‘tishi mumkin.

Ma’lum bo‘lgan xususiyatlar:

• Displey: 12,6 dyuym, 2800×1752 AMOLED, 120 Hz gacha / 14,6 dyuym, 2960×1848 AMOLED, 120 Hz gacha
• Chipset: MediaTek Dimensity 9500
• Kameralar: 13 MP + 12 MP old kamera / 13 MP + 8 MP ultra-keng burchakli kamera + 12 MP old kamera
• Xotira: 12+256 GB + microSD, 12+512 GB + microSD / 16+1024 GB gacha + microSD
• Qo‘shimcha imkoniyatlar: IP68 suv va changdan himoya, S Pen stilusi to‘plamga kiritilgan
• Batareya va quvvatlash: 10 600 mA·soat, 45 Vt / 11 600 mA·soat, 45 Vt
• Narxi: 1492 dollardan / 1767 dollardan boshlanadi

MediaTek kompaniyasi 2 nanometrlik texnologik jarayon asosida ishlab chiqilgan Dimensity 9600 Pro yangi flagman protsessorini taqdim etdi

Kompaniya neyron protsessorining unumdorligiga alohida e’tibor qaratgan. MediaTek 1090 dvigateli yirik generativ modellar va agentlik xizmatlarini qo‘llab-quvvatlaydi. AI modellariga yuboriladigan so‘rovlarni qayta ishlash tezligi 51% ga, har bir vatt energiyaga to‘g‘ri keladigan tokenlar generatsiyasi esa 55% ga oshgan.

Protsessor eng yangi xotira va aloqa standartlarini qo‘llab-quvvatlaydi: Bluetooth 6.2, UFS 5.0 va 10 667 MT/s gacha tezlikdagi LPDDR6. Dimensity 9600 Pro sakkiz yadroli konfiguratsiyaga ega: ikkita Arm C2-Ultra superyadrosi va L2 kesh hajmi turlicha bo‘lgan oltita unumdor C2-Pro yadrosi.

Kompaniya ma’lumotlariga ko‘ra, bir yadroli ishlash unumdorligi 17% ga, ko‘p yadroli ishlash esa 15% ga oshgan. Energiya samaradorligi mos ravished a 37% va 61% ga yaxshilangan. Shu sababli protsessor 185 FPS tezlikda o‘yinlarni hamda nurlarni kuzatish (ray tracing) texnologiyasini qo‘llab-quvvatlaydi.

Arm Mali-G2 Ultra NX grafik yadrosi avvalgi avlodga nisbatan 27% kuchliroq bo‘lgan, energiya samaradorligi esa 24% ga yaxshilangan.

Samsung yetti yil davomida buklanadigan Galaxy Fold smartfonlari qanday rivojlanganini ko‘rsatdi

2019-yilda taqdim etilgan birinchi Galaxy Fold 276 gramm og‘irlik va 17,1 mm qalinlikka ega bo’lgan.

Galaxy Z Fold 2 biroz yupqaroq bo‘lgan, biroq og‘irligi oshgan — 16,8 mm va 282 gramm. Keyingi avlodlarda esa smartfonlar asta-sekin yupqaroq va yengilroq bo‘lib borgan: Fold 3 — 16 mm va 271 gramm, Fold 4 — 15,8 mm va 263 gramm, Fold 5 — 13,4 mm va 253 gramm, Fold 6 — 12,1 mm va 239 gramm.

Seriya eng katta o‘zgarishni Galaxy Z Fold 7 bilan boshdan kechirdi. Smartfon avvalgi avlodga nisbatan ancha ixcham va yengil bo‘ldi — qalinligi 8,9 mm, og‘irligi esa 215 gramm.

Galaxy Z Fold 8 esa lineyka rivojini kengroq buklanadigan formatda davom ettirdi. Qalinligi 9,7 mm bo‘lishiga qaramay, uning og‘irligi atigi 201 grammni tashkil etadi.

Google, Oppo va Vivo kelasi yili iPhone Ultra modelidagidek ekranlarga ega bo‘ladi

The Elec nashri xabariga ko‘ra, Google, Oppo va Vivo keyingi avlod buklanadigan qurilmalari uchun ikki qatlamli UTG-displeylarni joriy etish maqsadida Samsung Display bilan hamkorlik qilmoqda.

Ma’lum bo‘lishicha, ayni texnologiya Apple kompaniyasining ilk buklanadigan iPhone modelida ham qo‘llanadi. Samsung Display va uning hamkorlari har bir qurilmaning texnik xususiyatlariga mos ravishda displey hamda UTG-modulni ishlab chiqadi.

Bunday konstruksiyada UTG modulining bir qatlami displey ustida joylashadi, ikkinchi qatlam esa uning ostida bo‘lib, OLED-panelni qo‘llab-quvvatlaydi.

Samsung OLED-panel ostiga maxsus titan plastina joylashtirish orqali ekrandagi bukilish izini deyarli butunlay yo‘q qilishga erishgan.

Oppo esa bukilish sohasini suyuq 3D-bosib chiqarish texnologiyasi yordamida to‘ldirganini ta’kidlamoqda. Natijada tekisroq yuza va qalinroq himoya oynasi hosil bo‘ladi.

Hisobotga ko‘ra, Oppo va Vivo o‘z buklanadigan qurilmalarini 2027-yilning birinchi yarmida taqdim etadi.

Google kompaniyasining navbatdagi buklanadigan smartfoni esa yilning ikkinchi yarmida, odatdagi taqdimot jadvaliga ko‘ra, ehtimol avgust oyida chiqadi.

Qualcomm Snapdragon protsessorlari narxini sezilarli darajada oshirdi

Bugundan boshlab kompaniya o‘z chiplarining narxini kamida 10 foizga rasman oshirmoqda.

Qualcomm direktori Krishtianu Amonning ta’kidlashicha, kompaniya xarajatlarning sezilarli darajada oshishiga duch kelgan. Shu sababli Qualcomm o‘z mahsulotlari narxini ko‘tarishga majbur bo‘lgan.

Ushbu qarorga komponentlar taqchilligining davom etayotgani, shuningdek, butun ta’minot zanjiri bo‘ylab xarajatlarning ortishi ta’sir ko‘rsatgan.

Narxlarning oshishi ko‘plab qurilmalarga ta’sir qiladi. Qualcomm kompaniyasi Apple uchun modem chiplarini, Samsung va boshqa ishlab chiqaruvchilar uchun esa smartfonlar, taqiladigan qurilmalar hamda noutbuklar uchun mobil chiplarni ishlab chiqaradi.

Demak, Qualcomm chiplarining qimmatlashishi ayrim qurilmalar narxiga ham ta’sir qilishi mumkin.

Apple Mac mini M4 modelini olishga ulgurmaganlarga Mac mini M6 modelini yuboradi

Apple kompaniyasidan misli ko‘rilmagan saxovat aksiyasi: Mac mini qurilmasiga buyurtma bergan, ammo hali qurilmasini olmagan xaridorlar endi yangi Mac mini M6 modeliga ega bo‘lishadi. Bepul yangilanishni tasdiqlovchi xabarlarni AQShdagi ayrim foydalanuvchilar allaqachon olishgan.

Yangi Mac mini modelining boshlang‘ich narxi $899. Avvalgi avlodni esa dastlab $599 ga sotib olish mumkin edi. Keyinchalik narxlar qayta ko‘rib chiqilib, 256 GB xotirali versiya sotuvdan chiqarilgach, uning narxi $799 gacha oshirilgan.

Yubileyga bag‘ishlangan XBOX Series X25 13-noyabrda $899 evaziga sotuvga chiqadi

Cheklangan miqdordagi klassik yashil rangdagi XBOX Series X25 konsoli iyun oyidayoq taqdim etilgan edi. Endi esa konsol uchun $899 evaziga oldindan buyurtma berish boshlandi. Eng yaqin yetkazib berish muddati — noyabr oyi.

Bu narx evaziga foydalanuvchilar raqamlangan, disk yurituvchiga ega va 1 TB xotirali konsol, shuningdek, oldindan o‘rnatilgan Halo: Campaign Evolved o‘yinining nusxasiga ega bo‘lishadi.

Bundan tashqari, $79 evaziga XBOX X25 Special Edition geympadini ham oldindan buyurtma qilish mumkin. Uni xaridorlarga oktyabr oyidayoq yetkazib berish rejalashtirilgan.

Apple AirPods 5 quloqchinlarini sentabr oyida yangi qurilmalar bilan birga taqdim etadi

Bloomberg xabariga ko‘ra, sentabr oyida bo‘lib o‘tadigan Apple tadbirida AirPods 5 quloqchinlari ikki xil versiyada taqdim etilishi mumkin: standart va faol shovqinni bostirish (ANC) funksiyasiga ega model.

Dastlab AirPods 5 modelining taqdimoti 2027-yilga rejalashtirilgani taxmin qilingan edi. Endilikda esa yangi quloqchinlar kompaniyaning boshqa yangi qurilmalari bilan birga 9-sentabr kuni taqdim etilishi kutilmoqda.

Shu bilan birga, Siri va Visual Intelligence orqali sun’iy intellekt funksiyalaridan foydalanish uchun o‘rnatilgan kameraga ega AirPods quloqchinlarni hali kutishga to’g’ri keladi. Bunday model kelasi yildan oldin chiqishi kutilmayapti.

Channel created