Солтүстік Қазақстан облысында жасөспірімдер арасындағы құқық бұзушылықтың алдын алу мәселелері талқыланды

Солтүстік Қазақстан облысында полиция қызметкерлері Оқушылар сарайында өткен ата-аналардың жиналысына қатысып, кәмелетке толмағандар арасындағы қылмыстың алдын алу жолдарын сараптады. Жыл басынан бері өңірде жасөспірімдер жасаған 30 қылмыс тіркелген, оның 13-і жазғы демалыс кезеңіне тиесілі болып отыр. Құқық қорғау органдары өкілдерінің айтуынша, заңнамадағы өзгерістерге байланысты ұрып-соғу және денсаулыққа жеңіл зиян келтіру де қылмыс санатына жатқызылған, алайда кейбір жасөспірімдер мұндай әрекеттердің соңы қылмыстық жауапкершілікке әкелетінін толық түсіне бермейді. Сондай-ақ тіркелген қылмыстардың ішінде есірткі айналымы мен интернет-алаяқтыққа қатысты деректер де бар. Тәртіп сақшылары ата-аналарды балалардың бос уақытын мұқият бақылауда ұстауға және оларға заңды бұзудың салдары туралы үнемі түсіндіріп отыруға шақырды.