Солтүстік Қазақстан облысында ерлі-зайыптылар алаяқтарға сеніп, 10 миллион теңгесінен айырылып қалды

Солтүстік Қазақстан облысының ауылдық аудандарының бірінде ерлі-зайыптылар интернет-алаяқтардың арбауына түсіп, 10 миллион теңге шығынға ұшырады. Оқиға 60 жастағы ауыл тұрғынының Instagram желісінен банк тарапынан берілетін төлемдер туралы жалған жарнаманы көруінен бастау алған. Өтінім қалдырғаннан кейін оған өзін «Goldmans Group» брокерлік компаниясының маманы ретінде таныстырған белгісіз тұлға хабарласып, инвестиция арқылы табыс табуды ұсынған. Алаяқтардың сөзіне сенген әйел арнайы шот ашып, алғашқы ақшасын аударған. Кейін жалған «аналитиктің» нұсқауымен бұл схемаға күйеуін де қатыстырып, барлық жиған-тергенін жұмсаған, сондай-ақ бірнеше банктен несие рәсімдеген. Полиция қызметкерлері алаяқтық схемаға дроппер ретінде қатысқан бірқатар адамдарды анықтап, жәбірленушілерге келтірілген шығынды өндіру үшін сотқа талап арыз беруге көмектесті. Тәртіп сақшылары бейтаныс адамдардың нұсқауымен күмәнді қаржылық операцияларды жасамауға шақырады.