Ашәҟәыҩҩцәа Владимир Занҭариеи Анатоли Лагәлааи ргәалашәара ахәылԥаз мҩаԥысит Аԥсуа драматә театр аҿы.

Аусмҩаԥгатә аԥсуа-адыга фестиваль "Арифмақәа Риҵаҟны" аҳәаақәа ирҭагӡаны имҩаԥысит.

Агәалашәаратә хәылԥазы иаҭааит Ҟабарда-Балкариа, Адыгеиа, Ҟарачы-Черқьесиа рҟынтәи аделегациақәа, иара убас Аԥсны апоетцәеи, алитераторцәеи, актиорцәеи.

Кьасоу Ҳагба, Сырбеи Сангәлиа, Ҭеимураз Чамагәуа, Октаи Чкотуа, Гәында Сақаниа, Саниет Нагороков, Замира Тов, Артур Кенчешаов, Ҳасан Аллало уҳәа егьырҭгьы ирыԥхьеит Занҭариеи Лагәлааи рҩымҭақәа.

Ахәылԥаз иалахәын зҩымҭақәа ирыԥхьаз абаҩхатәра ҿарацәагьы. Урҭ рхыԥхьаӡараҿы дыҟан Sputnik Аԥсны аԥсуа версиа аредактор-аҭыжьҩы Шьазина Бганԥҳа.

🖇 Владимир Занҭариа — апоет, академик, афилологиатә ҭҵаарадыррақәа рдоктор, Д. Гәлиа ихьӡ зху Аҳәынҭқарратә премиа алауреат, "Ахӡ-Аԥша" аорден II аҩаӡара занашьоу, иԥсҭазаара далҵит 72 шықәса дшырҭагылаз хәажәкыра 21 2026 шықәсазы.

Анатоли Лагәлаа — аԥсуа поет, апрозаик, апублицист, СССР-и, Урыстәылеи, Аԥсни рышәҟәыҩҩцәа реидгылақәа рлахәыла, ажурнал "Алашара" аредактор хада "Ахьӡ-Аԥша" аорден III аҩаӡара занашьоу.

Иԥсҭазаара далҵит жәабран 15 рзы 64 шықәса дшырҭагылаз.