73 шықәса дшырҭагылаз иаалырҟьаны иԥсҭазаара далҵит аҵарауаҩ, ауаажәларратә усзуҩ Владимир Занҭариа ҳәа Sputnik ахь адырра ҟаиҵеит Аԥсуаҭҵааратә институт аиҳабы Арда Ашәба.

"Иара дычмазаҩын. Уи рацәак ҵуамызт изықәдыргылеишьҭеи, аха иаразнак ишьапы дықәнарҟьеит. Владимир Константин-иԥа 72 шықәса ихыҵуан, макьана иҟаиҵашаз рацәан. Ари ҳтәыла азы ицәыӡ дууп", — ҳәа азгәеиҭеит Ашәба.

📎 Владимир Занҭариа – апоет, академик, афилологиатә ҭҵаарадыррақәа рдоктор, ауаажәларратәии аполитикатәи аузуҩ, Д.И. Гәлиа ихьӡ зху Аҳәынҭқарратә премиа алауреат, Акультура зҽаԥсазтәыз аусзуҩ, "Ахьӡ-Аԥша" аорден II аҩаӡара занашьоу, Аԥсны Ашәҟәыҩҩцәа рассоциациа ахантәаҩы, Аԥсуаҭҵааратә институт алитература аҟәша аҭҵаарадырратә усзуҩ хада.