Аҵарашықәс ҿыц иалагеижьҭеи ҳусбарҭахь иаарыцҳахьоу, ахәыҷы иқәымчра иазку ахҭысқәа рхыԥхьаӡара маҷӡам, урҭ зегьы ирықәнагоу ахылаԥшра раҳҭоит ҳәа арадио Sputnik аҟны илҳәеит ахәыҷҭәы омбудсмен Мактина Џьынџьалԥҳа.

Лара иазгәалҭеит, аиԥш зеиԥшу ахҭысқәа ҷыдала агәцаракра шырҭаху, избанзар, иҟалалоит ахҭысқәа ахәыҷы иганахь ақәымчра аныҟам, ааӡара, амҩақәҵара қәымчраны ианрыдыркыло лхәеит Џьынџьалԥҳа.

"Ахҭысқәа раан, ҳара закәаншьаҭала ҳазнеиуеит урҭ рыӡбара, аха иҟоуп амилаҭтә ҟазшьагьы. Уигьы ҳасаб ахьазутәу ыҟоуп. Аимак ахьцәырҵуа еснагь иаҭахуп акәамаҵамарақәа зегьы ҳасаб рзура", — лҳәеит ахәыҷы изинқәа рыхьчаҩ.

🖇 Уажә ааигәа Аԥсны ашколқәа рҿы абуллинг еиҳа-еиҳа аҭыԥ ахьаиуа инамаданы ахәыҷтәы омбудсмен аҳәамҭа ҟалҵеит.

Мактина Џьынџьалԥҳа ашколқәа рдиректорцәа аклассқәа рҿы апсихологиатә ҭагылазаашьа иацклаԥшларц, ақәымчра иақәшәаз ахәыҷқәа ахшыҩзышьҭра рырҭаларц, иара убас ашколқәеи аҭаацәеи, апсихологцәеи, асоциалтә рҵаҩцәеи реинырраз абжьгара ҟалҵеит.
#social