​-gancha: vergul kerakmi yoki yoʻq

Tilshunoslikka oid kitoblarga koʻra, -cha ravish yasovchi qoʻshimcha sanaladi. Feʼllarga -gan shaklidan soʻng qoʻshiladi: shoshgancha, istagancha, turgancha, qaragancha kabi. Bunda ish-harakatning qay tarzda bajarilishini, oʻxshatilganlik va qiyoslashni anglatadi.

Koʻpincha mana shu -gancha shaklidan keyin vergul ishlatiladi. Lekin bu – xato. Bunday hollarda vergul mutlaqo kerak emas:

Shu payt darvozadan xoʻppa semiz, yuzlari kepchikday, gajakdor satang xotin harsillab-gursillagancha savlat toʻkib kirib keldi.
Gazetadan.

It umbaloq oshib, angillagancha devorga borib urildi.
S. Nurov, Narvon.

Alpinist degancha bor ekan. Yurishning koʻp haddini olgan ekan.
M. Mansurov, Yombi.

Lekin -gancha shaklli ravish kirish soʻzi boʻlib kelsa, vergul qoʻyish kerak. Chunki kirish soʻz vergul talab qiladi:

Aytgancha, bu holatni ham koʻzdan qochirmaslik kerak.

Mavzuga aloqador:
👉 Vergul qachon ishlatiladi: eng asosiy 7️ ta qoida
👉 Islohtalab qoidalar: -ganda va vergul
👉 -da yuklamasi va vergul
👉 Esiz: vergul kerakmi yoki yoʻq?
👉 “Deb” va vergul

@oriftolib | Sahifalarimiz