☑️ Kərbəlanın unudulan şəhidləri

Kərbəla faciəsi İslam tarixinin ən ağrılı hadisələrindən biridir. Heç bir müsəlman Hüseyn ibn Əlinin (Allah ondan razı olsun) şəhid edilməsini yüngül saymaz. O, Peyğəmbərin ﷺ nəvəsi, Əhli-beytin böyük şəxsiyyətlərindən biri və İslam ümmətinin sevimli simalarından idi. İmam Hüseynin (Allah ondan razı olsun) Kərbəlada şəhid olması və onunla əlaqəli hadisələr barədə çoxlu mötəbər məlumatlar var. Bu mövzuda azğın insanların uydurduqları yalanlara tutarlı cavablar da mövcuddur. Bu mövzuda çoxlu insanların diqqətindən kənarda qalan məsələlərdən biri barədə qısa yazmaq istəyirik.
Kərbəla deyiləndə yaddaşlarda təkcə Hüseyn ibn Əli (Allah ondan razı olsun) canlanır. Lakin tarixi mənbələr göstərir ki, Aşura günü Hüseynlə birlikdə Bəni-Haşimdən təxminən iyirmi nəfər də şəhid olmuşdu – qardaşları, qardaşı oğulları və əmisi oğulları. Hətta şiə elminin özünün ən nüfuzlu klassik tarixçisi Şeyx Müfid "əl-İrşad" əsərində bu şəhidləri bir-bir sadalayır: Abbas, Cəfər, Abdullah və Osman – Ümmül-Bənin övladları; Übeydullah və Əbu Bəkr künyəsi ilə tanınan Muhəmməd əl-Əsğər – Leyla binti Məsudun övladları. Digər klassik tarixçilər (İbn Şəhr Aşub, İbn Əbil-Fəth əl-İrbəlli və başqaları) bu siyahıya daha bir qardaşı – Ömər ibn Əlini də əlavə edirlər.
Diqqət yetirin: bu, kənar bir mənbə yox, şiə elminin öz təməl mətnidir.
Burada düşündürücü bir sual yaranır: əgər Kərbəla faciəsinin mahiyyəti Əhli-beytə edilən zülmdürsə, nə üçün diqqət demək olar ki, tək bir adın ətrafında cəmlənir? Osman ibn Əli də, Əbu Bəkr ibn Əli də, Ömər ibn Əli də – eyni gündə, eyni səbəb üçün, eyni ailənin canından oldular. Onların adı niyə kölgədə qalır?
Əli ibn Əbu Talib (Allah ondan razı olsun) öz doğma övladlarına dəfələrlə Əbu Bəkr, Ömər və Osman adını (yaxud künyəsini) vermişdi. Ərəb mədəniyyətində ad qoymaq sevgi və hörmətin ifadəsidir; bu, təsadüf ola bilməz. Bu adları daşıyan övladlar da atalarının yolundan dönmədilər – əksinə, qardaşları Hüseynin yanında şəhid oldular. Bu gün bəzi dairələrdə qaçırılan adlar, əslində Kərbəlanın qanı ilə yazılıb.