Azatlıq Radiosı | Азатлык Радиосы

Казанда куәт оешмалары вәкилләре Казан федераль университеты тулай торакларыннан студентларны чыгаруга каршы имза җыйган студентларга кисәтү тапшырган.

“Ирек” хокук яклау үзәгенең Telegram-каналы хәбәр итүенчә, бүген волонтерлар янына полиция хезмәткәрләре килеп, экстремистик эшчәнлекне булдырмау турында рәсми кисәтү тапшырган. Әлегә мондый кимендә биш очрак билгеле.

Кисәтү кәгазендә “җыеннар, митинглар, демонстрацияләр, йөрешләр һәм пикетлар вакытында экстремистик эшчәнлек алып бару тыела” диелә. Шулай ук чараларны оештыручыларның канун нигезендә җаваплылыкка тартылачагы искәртелгән.

Балигъ булмаган активист хокук яклаучыларга сөйләвенчә, аның янына полиция хезмәткәрләре битлек киеп килгән һәм исемнәрен әйтүдән баш тарткан. Алар аны машинага утырырга мәҗбүр иткән, шуннан соң “Украина кораллы көчләре” турында сөйләшә башлаган.

▪️Тулай торакны бушату Казанда узачак Көньяк-Көнчыгыш Азия дәүләтләре берлеге (АСЕАН) саммиты белән бәйле булуы турында Азатлык Радиосы язган иде. Университетта студентларны чыгаруны иминле чаралары һәм инженер челтәрләре ремонты белән аңлатканнар.

@azatliqradiosi

Мәхкәмә Сарытау мөфтиенең элекке урынбасары Әл Хиха Нидаль Авадалла Әхмәдны кулга алган

“Коммерсантъ” язуынча, 10 май тирәләрендә мәхкәмә Әл Хих һәм тагын җиде кешене (шул исәптән Петербурдан мөселман җәмгыятенең элекке рәисе Мөхәммәт Хеннины) сак астына алган. Алар Русия Җинаять кодексы 205.5 маддәсенең 2нче өлешендә («Террорчылык оешмасы эшчәнлегендә катнашу») гаепләнә. Тикшерү фаразынча, алар иң соң дигәндә 2025 елның апрелендә Русиядә тыелган “Мөселман кардәшләре” халыкара оешмасына кергән һәм Петербурда аның бүлекләре утырышларында катнашкан. Гаепләнүчеләрнең кайсы төбәктә кулга алынуы әлегә билгеле түгел.

▪️Әл Хих Фәләстиндә туган. 1990нчы елларда Русиягә килгән. Сарытау медицина университетын тәмамлаган, 2016 елны университет тәмамлап укытучы дипломына ия булган. Русия ватандашлыгын 2011нчы елны алган. Мөфти урынбасары вазифасын Мөкаддәс Бибарсов заманында башкарган.

▪️Элегрәк Азатлык Радиосы Равил Гайнетдин җитәкчелегендәге Русия мөселманнары Диния Нәзарәтенә караган берничә дин әһеленең тоткарлануы турында язды. Белгеч бу Гайнетдин җитәкләгән нәзарәткә чираттагы басымның дәвамы дип саный.

@azatliqradiosi

Хәерле иртә, хөрмәтле укучыларыбыз! Бүген 26 май, әлеге сәгатькә булган кайбер хәбәрләрне барлыйк:

🔸АКШ хәрбиләре Иранның көньягына һөҗүм иткән. Fox News белдерүенчә, Һормүз бугазында мина урнаштырырга тырышкан Иранның ике көймәсе, шулай ук Бәндәр-Аббас портындагы зенит-ракет комплексына һөҗүм ясалган. Һөҗүмнән соң Иран кораллы көчләре вәкилләре нефть бәясенең 200 долларга кадәр артуына әзер булырга чакырган.

🔸Русия армиясенең Одессага һөҗүме нәтиҗәсендә, бер кеше һәлак булган, өч кеше яраланган. Бу хакта Украина гадәттән тыш хәлләр хезмәте хәбәр итә.

🔸Ямалдагы "Полярная сова" колониясендә утыручы хокук яклаучы Бахром Хамроевның медицина ярдәме күрсәтелмәү һәм авыр шартларда тотылу сәбәпле сәламәтлеге начарланган. Бу хакта Facebook-та Хамроевның хатыны яза. Хамроев тугыз айга якын штраф изоляторда һәм ПКТда тотылды.

🔸Узган ел Кырымда кулга алынган мөслимә Февзие Османованы һәм аның белән бер камерада тотылучыларны Акмәчеттәге 1нче санлы тикшерү изоляторының ирләр корпусына күчергәннәр. Бу хакта "Кырым теләктәшлеге" проектына кызның әнисе Эльянора Османова белдергән. «Зонателеком» аша сөйләшкәндә, Февзие камераның ышык урында урнашуы сәбәпле "дымлы һәм салкын" булуын әйткән. Шулай ук яңа камерада суыткыч булмау сәбәпле, мөслимәнең азык-төлекләре бозылган.

🔸Cызраньдагы "Роснефть" нефть эшкәртү ширкәте Украина дроннары һөҗүменнән соң эшен туктаткан. Бу хакта Reuters хәбәр итә. Һөҗүм 21 майда ясалган булган.

@azatliqradiosi

Русия тышкы эшләр министрлыгы Украина башкаласына яңа һөҗүмнәр белән янады

Министрлык белдерүенчә, 22 майга каршы төндә Старобельскига ясалган һөҗүм "сабырлык чигеннән узган".

"Русия Федерациясе кораллы көчләре Киевтагы Украина хәрби-сәнәгать комплексы ширкәтләренә системлы һөҗүмнәр ясый башлый. Һөҗүмнәр карар кабул итү үзәкләренә һәм хәрби идарә пунктларына да юнәлтеләчәк", диелә белдерүдә.

Шулай ук Мәскәү чит ил ватандашларын, шул исәптән дипломатик миссияләр һәм халыкара оешмалар вәкиллекләре хезмәткәрләрен" мөмкин кадәр тизрәк Киевтан китәргә чакыра, ә шәһәр халкына "хәрби һәм административ инфраструктура корылмасына якын килмәскә" киңәш итә. Украина хакимияте белдерүдә "хунта" һәм "Зеленский режимы" дип атала.

@azatliqradiosi

Башкортстан: мобилизациягә эләккәннәрнең кимендә 1 меңе үлгән

Татарстаннан мобилизацияләнгән 960 кешенең үлеме билгеле. Бу саннар тагын да зуррак була ала, хакимият чынбарлыкны яшерә.

@azatliqradiosi

Русиядә берничә мөселман дин әһеле тоткарланды

Белгеч әлеге тоткарлаулар мөфти Равил Гайнетдин мөфтиятенә каршы барган сәясәтнең дәвамы дип саный.

Тулырак 👉 безнең язмада укыгыз.

@azatliqradiosi

Русиянең Украинага каршы баскын сугышында Башкортстаннан мобилизацияләнгәннәрнең кимендә 1 меңе һәлак булган.

Бу сан Медиазона исемлегеннән күренә. Соңгы яңартуда республикадан кимендә 1003 мобилизацияләнүченең үлеме күрсәтелә.

Исемлекне журналистлар ачык чыгынаклардан туплый. Сүз медиа тапкан һәм тикшергән үлемнәр саны турында бара. Чын югалтулар саны күпкә зуррак булырга мөмкин, хакимият чын саннарны яшерә.

Икенче һәм өченче урында нинди республикалар бара? Бу хакта 👉 монда укыгыз.

@azatliqradiosi

Хәерле иртә, хөрмәтле укучыларыбыз! Бүген 25 май, әлеге сәгатькә булган кайбер хәбәрләрне барлыйк:

🔸Белгород өлкәсендә дрон һөҗүме нәтиҗәсендә бер кеше һәлак булган, Ярослауда бер хатын-кыз яраланган. Төнлә дроннар әлеге ике өлкәгә һөҗүм итте. Ярослау - Мәскәү транспорт юлы ябылып торды. Бу хакта Ярослау өлкәсе губернаторы Михаил Евраев белдерде.

🔸Башкортстанның Уфа районындагы «Нурлино» саклау һәм кудыру станциясендәге янгыннан соң эзләү-коткару эшләре тәмамланган. Коткаручылар 13 майда булган янгын нәтиҗәсендә һәлак булган дүртенче эшченең мәетен тапкан. Бу хакта «Транснефть-Урал» матбугат хезмәте хәбәр итә.

🔸Русия Балтыйк илләренең "урыслар хокукларын кысуы" сәбәпле БМОның Халыкара мәхкәмәсенә мөрәҗәгать итәргә ниятли. Бу хакта Русия тышкы эшләр министрлыгына сылтанып, "Известия" яза. Министрлык фикеренчә, Латвия, Литва һәм Эстония хакимиятләре урыс телен куллануны тыя, тарихны яңадан яза һәм үз сәясәтләре белән килешмәүчеләрне эзәрлекли.

🔸Британия саклану министры Джон Хилиның Эстониягә сәфәрдән соң Британиягә кайтып барганда очкычының Русия чигендә GPS сигналы томаланган. Бу хакта The Times хәбәр итә. Пилотларга урыннарын билгеләү өчен резерв навигация системнарын кулланырга туры килгән.

🔸Росимущество Бөгелмәнең элекке мэры Линар Закиров һәм аның якыннарының Казан, Мәскәү, Сочидагы 122 миллион сумлык милеген дәүләт файдасына тартып алган. "Реальное время" язуынча, Закировның ике чит ил машинасы сатуга чыгарылган.

@azatliqradiosi

Казанда полиция Казан фдераль университеты (КФУ) студентларының имзаларын җыйган “Ирек” хокук яклау үзәге активистларын куып тараткан

Волонтерлар икенче көн студентларның тулай торактан чыгарылуына каршы имза җыйган. Алар Бауман урамыннан “Кремлевская” метросына таба киткән һәм анда тиз арада полиция вәкилләре килеп, “акция”не туктатырга кушкан.

“Иминлек максатыннан без хәзергә имза җыюны туктатабыз”, ди активистлар.

“Ирек” оешмасы Телеграм каналы язуынча, ике көндә алар КФУ студентларыннан 200дән артык имза җыйган.

Кичә, 23 май көнне, активистлар КНИТУ-КАИ һәм Бауман урамындагы сәгать янында имзалар җыйган.

КФУ студентлары тулай торак бүлмәләренә башка корпуслардан студентларны алдан кисәтмичә күчереп урнаштырулары турында әйтә. Моңа кадәр июньдә узачак Русия–АСЕАН форумы вакытында студентлардан “500 урын бушатырга” таләп итүләре билгеле булган иде.

RusNews Телеграм каналы студентлар сүзләренә сылтанып язуынча, 13 корпустан дүрт мең кешене чыгаралар һәм моны ремонт кирәк булу белән аңлаталар.

"Хәзер исә аларны калган 7 корпуска тыгызлап тутырырга тырышалар", ди басма.

Югары уку йорты вәкилләре "тыгызлап урнаштыру" турында карарны КФУ хакимияте кабул иткәнен һәм аның июнь аенда гына гамәлдә булачагын белдерә.

@azatliqradiosi

Бүген төнлә Русия армиясенең Киев һәм Киев өлкәсенә көчле һөҗүме нәтиҗәсендә дүрт кеше һәлак булган, якынча 100 кеше яраланган.

Бу мәгълүматларны Украина президенты Владимир Зеленский бастырып чыгарды. Аның сүзләренчә, Киевта 30лап бинага зыян килгән. Элегрәк Киев мэры Виталий Кличко һөҗүм нәтиҗәсендә ике кешенең үлүе, ким дигәндә 81 кешенең җәрәхәтләнүе турында белдергән иде.

Һөҗүм дроннар һәм ракетлар, шул исәптән “Орешник”тан ясалган. BBC язуынча, сугыш башланганнан бирле бу Мәскәүнең "Орешник" ракеты белән өченче тапкыр һөҗүм итүе.

@azatliqradiosi