اورگی هردن‌بیر بولانسا دا، تئز-تئز اودقونوب آغزینا گلن قاتی زهرله موباریزه آپاریردی.
مأیوسلوقلا بیر مرتبه ده قالخدی. بیلمه‌دی داییسی‌نین منزیلی ساغدادیر یوخسا سولدا. بو باره‌ده هئچ نه یادینا دوشموردو. ساغ قاپی قیرمیزی رنگ ایدی. قاپی‌نین کنارلاری ناخیشلارلا بزه‌دیلمیشدی. سولداکی قاپی ایسه بوم-بوز. فیکیرلشدی، داییسی‌نین قاپیسی بو قیرمیزی ناخیشلارلا بزه‌دیلمیش قاپی اولماز. بوز قاپییا یاخینلاشیب تاققیلداتدی، سمیر گلمه‌دی. قاپیلاری سحو سالدیغینی دوشوندو. چئوریلیب بیر ده قیرمیزی ناخیشلارلا بزه دیلمیش قاپییا باخدی. یئنه بو بوز قاپینی دؤیدو، سس-سمیر چیخمادی، قاییتماق ایسته‌سه ده، بو دفعه بوز قاپینی برک دؤیدو. منزیلدن آیاق سسی ائشیدیلدی. قاپی‌نین گؤزلویو قارالدی، کیلید شاققیلتی ایله آچیلدی.
باخ ایندی، بلکه ده چؤلده مئح اسیر یارپاق تیتره‌ییر، قوش اوچور، ماشین کئچیر. محله دوکانی موشتری ایله آشیب-داشیر، زیوه‌دکی پالتارلار بئلله‌نیر. ۲۱ نؤمره‌لی منزیلدن گلن «آااه.. اوففف»لار آچیق پنجره‌دن کوچه‌یه اؤز احتیراس نغمه‌سینی یاییردی. قاپینی آچان نایله ایدی.
هامی آغلیندان کئچمیشدی، آمّا نایله... داییسی قیزی وفانین ان یاخین رفیقه‌سی اولسا دا، اونونلا بوردا قارشیلاشاجاغینا قطعی گومانی یوخ ایدی. یعنی بیر آدام تاپیلمادی قالیب هر یئری ساهمانا سالسین؟ نییه نایله؟.. بو ناقولای تصادوف لاپدان قالخان کولک کیمی هر شئیی سیلکه‌لدی.
- بویور کئچ - نایله تعجبونو گیزلتمک اوچون گؤزلرینی قارشیسیندا دایانان، چوخداندی اوزونو گؤرمه‌دییی، سسینی اشیتمه‌دییی کؤهنه تانیشیندان یاییندیردی.
باشی ایله سلام وئریب دهلیزه کئچدی. اوتاقلارا گؤز گزدیردی. اوشاق واختی آناسی ایله بیرگه تئز-تئز گلیردی. داییسی‌گیلده دئمک اولار، هئچ نه دگیشمه‌میشدی. ان چوخ دیوار کاغیذلارینین رنگی یادیندا قالمیشدی بو ائودن، نئجه وار ائله ایدی.
یاتاق اوتاغیندا چارپایی‌نین اوزه‌رینده دؤشک فیلان یوخ ایدی. ماتراسین(تخت) اورتاسینا دمیر چکیج قویموشدولار. دئیه‌سن جنازه‌نی یورغان-دؤشک قاریشیق آپارمیشدیلار. چکیجه باخیب گؤزو یول چکدی، اونو بو دورغونلوقدان اوتاغی بوروموش اودکولون اییی آییلتدی.
مطبخه کئچنده نایله‌نین چای سوزدویونو گؤردو:
-ائله بوردا اوتوراجام.
نایله آرمودو ایستکانا سوزولموش چایی ماسانین اوستونه قویوب قاب یوماغا قاییتدی.
نایله ده، عینیله دیوار کاغیذی کیمی هئچ دگیشمه‌میشدی -بئلی همین اینجه‌لیکده، قوللاری نام-نازیک، آیاقلاری دوم-دوز، بارماقلاری خیرداجا، اوزو آووج بویدایدی. ساچی‌نین رنگی پاریلتیسینی ایتیرمه‌میشدی. دوداقلاری همین طراوتده ایدی. ائله بیل بو ایللر عرضینده هئچ کیمین الی دگمه‌میشدی اونا. دی گل، ایللر اوّل عادیدن ده عادی بیر حرکتی ایله آغلینی باشدان چیخارسا دا، ایندی نایله‌نین قابلاری یودوقجا سیلکله‌نن اندامی قطعی شهوت یاراتمیردی اوندا.
خاطیره‌لری ده بویاتلاشمیشدی. بیر شئی یادینا دوشنده او بیرینی اونودوردو. ایندی او حادثه‌‌لرین اوستوندن او قدر واخت کئچمیشدی، خاطیرلاماق دا چتین ایدی نه‌ایسه. نایله ایله تانیشلیقلاری کینو لئنتی کیمی گؤزونون قاباغیندان کئچیردی. هله بیرینجی کورسدا پاییز امتحانلارینین آخیرینجی‌سیندا کامئراسی اولمایان ۵۰۴-جو آودیتورییاد(سالن‌دا) ایلک دفعه اونو اؤپمگینی، ایکینجی کورسون اورتالاریندا قروپلا بیرگه قاخا سفرلرینی مئشه‌نین درینلیکلرینده -یارپاقلارین اوستونده اوزانیب آپ-آیدین سمایا دقت کسیلدیکلرینی... اوچونجو کورسون اوّلینده نظامی کوچه‌سینده‌کی رستورانلارین بیرینده خئیلی ایچیب، سحر هارداسا گؤزلرینی بیرگه آچیب خئیلی اوتاندیقلارینی... چتینلیکله هر شئیی یادینا سالماق ایستسه ده، یئنه نایلیه اوّلکی گؤزله باخا بیلمیردی، تا کی گؤزلری اونون توپوقلارینا ساتاشانا قدر. توپوقلاری دا دگیشمه‌میشدی. نئجه عینی اؤلچوده و اعجازکار گؤرونوردو آیاقلارینداکی بو چیخینتیلار.
دوداقلاری قورودو، دونن یئدیکلری‌بیر-بیر گؤزونون قاباغینا گلدی، معده‌سی بوغازینا دیره‌ندی. چایدان بیر نئچه قورتوم ایچیب اودقوندو، بدنیندن داش آسیلدی.
-رنگین نییه آغ-آپ-آقدیر؟- نایله بایاقدان حؤکم سورن سسسیزلییی پوزدو.
-نه بیلیم... یقین یئمه‌گیمی قاریشدیرمیشام.
-آیران آلایدین- نایله سویودوجونو آچیب گؤز گزدیردی.
-یاخشییدیم، ایندی نه‌سه... - جانینی قورتارماق اوچون بیلمه‌دی نه دئسین، -ارینله نئجه یولا گئدیرسن؟
سویودوجونون سویوقلوغو نایله‌نین سسینه قاریشدی.
-ارین؟.. من نه واختدی بوشانمیشام، طاهیر معللیم.
آدی قولاغیندا یاد سؤز کیمی جینگیلده‌دی طاهیرین، سحر آچیلاندان ایلک دفعه ایدی کیمسه آدی ایله چاغیریردی اونو. هم ده گؤر نئچه واختدی نایله‌نین دیلیندن ائشیتمه‌میشدی ادینی!؟ تکجه بو یوخ، ایندی نایله‌نین دوداقلاریندا اوچوشان هر تانیش سؤز طاهیره نئچه ایل اوزاق گؤرونوردو.
https://t.me/Adabiyyatsevanlar
