علی رشتبر- قاییب

سلام منی تورپاغیندا بسله ین
آنا تورپاق،آناوطن ،آنا یورد!
قولاغیمدا منی هر آن سسله ین،
آذربایجان ،گؤزل وطن، سونا یورد-
آنا تورپاق آنا وطن آنا یورد!

سنسن منیم بئشیگیمین لایلاسی،
سنسن منیم لایلایمین صفاسی...
سنسن منیم شنلیگیمین دونیاسی،
یاراشیرسان جانانا یورد ،جانا یورد-
آنا تورپاق آنا وطن آنا یورد!

سن حسرتسن ، سن حیرتسن ،سن دیلک،
سن اوروجسان ،سن ناماز سان ،سن گرک.
سن عیصمتسن ،سن غیرتسن ،سن لئچک،
گرک اوغلون  بو سؤز لری قانا یورد-
آنا تورپاق آ،نا وطن ،آنا یورد!

سنده گزیب بؤیوک _بؤیوک اینسانلار،
قیلینج چکیب  نر ایگید لر ،آسلانلار.
سندن یازیب قاییب کیمی اوغلانلار،
اودا گرک سنی جاندان ، سانا یورد-
آنا تورپاق ،آنا وطن، آنا یورد.

https://t.me/Adabiyyatsevanlar