جعفر آروینی (تانیش)

اوره ییم توتقون سا قیناما منی
یانان اورک لرم من دئیلم کی
یالانچی گولوشه سیناما منی
اولان گرچک لرم، من دئیلم کی

گولوشوم آجی دیر زهر دادیندا
قبیر قبیر داشام آدسیز آدیندا
عزا لی ائو لرده کیشی، قادیندا
سولان دیلک لرم من دئیلم کی

هله کوچه لرده آخیلان قانام
هله دئیری دئیری قویلانمیش جانام
سانماکی گئچمیشده قالمیش انسانام
سولموش چیچک لرم من دئیلم کی

شیرین لر آجی دیر آیلاردیر منه
بالا وای آخ وایی های لار دیرمنه
نئچه گوز دای گورمور سای لاردیر منه
سونموش ببک لرم من دئیلم کی

جانیم دا هله ده مرمی لر جانلی
کوکسومده آنالار اوره گی قانلی
اولکه مین هر یانی چیسگین دومانلی
قیش دا کوله ک لرم من دئیلم کی

قیناما گولوشوم ساختا دادیر منیم
دولاشان قانیم سا لاختادیر منیم
یاییم دا یازیم دا شاختا دیر منیم
دوشن بیلک لرم من دئیلم کی

https://t.me/Adabiyyatsevanlar