"کؤمور الماسی"
«قاراوللیلر وناغیللار»

ادبیات سئونلر: «ویدا حشمتی»
بیر کیشی واریدی، بنّالیقلا مشغول ایدی. اونون صداقتلی و گؤزل بیر آروادی واریدی. محبّت بو بنّانین قوللارینا گوج، اوره‌یینه صافلیق وئرمیشدی. ایشله‌ینده ائله اورکدن ایشله‌ییردی کی، یورولماق بیلمیردی. لاکین بو بنّانین خوشبختلییی اوزون سورمه‌‌دی. اؤزوندن چوخ سئودیی آروادی وفات ائتدی.
بو شهرده لوتولار یاشایاردی. اونلار بنّانین وارینا صاحب اولماق اوچون، اؤز اویناشلاریندان بیرینی، خالا قیزی آدینا بنّایا وئریب، توی ائله‌دیلر. لوتولار آروادا اؤیره‌تدیلر کی، سن اؤزونو مؤحکم خسته‌لییه وور. بنّانی ایناندیر کی، منیم خسته‌لیییمین درمانی کؤمور الماسدیر. قوی شهر به شهر کؤمور الماس آختارماقدا اولسون. او قاییدانا دک بیز یئییب، ایچیب، کئفه باخاریق. بنّا ایشدن گلیر گؤرور کی آرواد یورغان-دؤشک سالیب یاتیبدیر. ائله زاریییر کی، نیققیلتی‌سی عالمی باشینا گؤتوروبدور.
-آی خانیم اولماسین آزار! سنه نه اولوبدو؟
آرواد چتینلیک‌له جواب وئریر:
-کیشی من چوخ خسته‌لنمیشم. تکجه علاجیم کؤمور الماسدی.
-آی بالا او نه‌جور الماسدی؟ اونو هاردان تاپماق اولار؟
آرواد دئییر:
-آی کیشی من اؤز اؤلومومو ایستیرم، اما سنین زحمته دوشمه‌یینی ایسته‌میرم. کؤمور الماسی تاپماق اوچون، گرک فلان شهره گئده‌سن. اورا دا اون گونلوک یولدو. من ده سنه قییمارام.
کیشی حاضیرلانیب، کؤمور الماسی آختارماغا گئدیر. بیر-ایکی گون یول گئتدیکدن سونرا بیر دوزده، قویون اوتاران چوبانا راست گلیر. چوبان سوروشور:
-آی کیشی یایین بو ایستی‌سینده، هارا بئله تله‌سیرسن؟
کیشی جواب وئریر:
-آی چوبان قارداش آللاهدان گیزلی دئییل، سندن نه گیزلی، آروادیم خسته‌له‌نیبدیر. دئییر کؤمور الماس تکجه علاجیم‌دیر. ایندی گئدیرم کؤمور الماسی تاپام.
چوبان الینی الی اوستونه ووروب، برکدن گولور:
-آ کیشی آرواد سنی آلدادیبدیر. یقین اونون گؤز آلتی‌سی وارمیش.
کیشی اینانماییر. چوبان دئییر:
-ایندیکی منیم سؤزومو اینانمادین، گل ایکیمیز ده گئدک سیزه. اولانی-بیتنی اؤزون گؤر.
چوبان سورودن بیر ارکک سئچیب، کسیر. اتینی خورجونونون بیر گؤزونه قویور. قاپییا چاتاندا، کیشینی ده خورجونون او بیری گؤزونه قویور. قاپینی دؤینده، قولدورون بیری باییرا چیخیب، گؤرور کی چوباندی، چیینینده یئککه بیر خورجون وار. قولدورباشی سوروشور:
-قارداش سیزه کیم لازیمدی؟
چوبان دئییر:
-بو ائوین صاحبی بنّا منه تاپیشیردی بیر جمدک گتیرم، ایندی همین جمده‌یی گتیرمیشم.
قولدورباشی، چوبانین ایچری کئچمه‌یینه ایزین وئریر. چوبان کونجون بیر طرفینده خورجونونو یئره قویوب، جمده‌یی چیخاردیر. اؤزو ده خورجونون یانیندا اوتورور. گؤرور کی لوتولارین مجلیسی یئییب-ایچمک‌له دولودور. چالغیچی چالیر، اوخویان اوخویور. بونلار دا یئییب-ایچیر، اویناییرلار. آرواد اورتالیقدا اوخویور:
-اریمی گؤندردیم کؤمور الماسینا،
سیز چالین من اویناییم.
او کیشی‌نین گئتمه‌سینه-گئتمه‌سینه
او کیشی‌نین ایتمه‌سینه-ایتمه‌سینه
حاجی اورتالیغا چیخاراق:
-آلمانی قویدوم باجایا،
قورخورام آلما آجییا،
بیر بوسه وئر سن حاجییا.
او کیشی‌نین گئتمه‌سینه، آی گئتمه‌سینه.
قولدور مارال اوخویور:
آلمانی قویدوم خارالا
قورخورام آلما سارالا
بیر بوسه وئر بو مارالا
او کیشی‌نین گئتمه‌سینه، گئتمه‌سینه.
لوتو اوخویور:
-آلمانی قویدوم قوتویا،
بو قوتودان او قوتویا
بیر بوسه وئر بو لوتویا
او کیشی‌نین گئتمه‌سینه-گئتمه‌سینه.
چوبان اوزونو خورجونا ساری توتاراق:
چوبانام گزدیم دوزلری،
خورجوندان باخیر گؤزلری
ائشیتدین‌می بو سؤزلری؟
لوتولارین کلله‎سینه، آ کلله‎‌سینه.
چؤبان خورجونونون آغزینی آچار. ایکیسی بیرله‌شیب، لوتولاری دؤیرلر. آروادی دا قووارلار. بنّا چوبانلا عؤمورلوک دوست اولار.

https://t.me/Adabiyyatsevanlar