خوشاگلمز حادثه
حئکایه
یازار:نادر یالچین
کؤچورن: ویدا حشمتی
حاضیرلایان: ادبیات سئونلر
مئییتین هنیری داغیلمایان منزیل اونا واهیمه‌لی گلدییی اوچون ایچری کئچمک باره‌ده خئیلی گؤتور-قوی ائله‌دی، هم ده بیلمیردی ائوده کیم قالیب، کیمله قارشیلاشاجاق، قارشیلاشدیغی آداملا نه دانیشاجاق. بو واخت گلیب چیخدیغینی نئجه باشا سالاجاق؟
اوچونجو مرتبه‌یه قدر آستا-آستا قالخدی. ایچری کئچمه‌یه بیر نئچه دفعه جهد ائتسه ده، اورک ائله‌مه‌دی، ائله همین سرعتله گئری قاییتدی. بو، داییسینی چوخ سئودییینه گؤره دئییلدی. اونلاری قوهوملوقدان باشقا هئچ نه باغلامیردی، آخیرینجی دفعه نه واخت گؤروشدوکلرینی ده خاطیرلایا بیلمیردی. یول بویو داییسی‌نین اؤلوم خبری اونون اوچون صابون کؤپویو ایدی.
هارداسا، بیر ساعت اوّل مئییتی مسجیده آپاردیقلارینی اؤگرندی. بو کفن-دفن صؤحبتلریندن یاخاسینی چکدییی اوچون قطعیّاًً ناراحات اولمادی. وله‌سین کؤلگه‌سینه وئریب دوشوندو: «گرک بیر مدت آنامین گؤزونه گؤرسنمه‌ییم».
اصلینده بیله-بیله گئجیکمه‌میشدی. دونن ایستانبولدا یاشایان دوستو گلمیشدی، گئجه‌نین بیلینمه‌ین ساعتلارینا قدر ایچمیشدیلر. بئله اولاندا تلفونو سؤندوروب یاتیر. سحرکی باش‌آغریسینا، اورک بولانتیسینا، حالسیزلیغینا آدینی تاپا بیلمه‌دییی بو وضعيّتلره تاب گتیرمک اوچون یاتماقدان باشقا علاج بیلمیردی.
اویاناندا آناسیندان، باجیسیندان گلن آرد-آردا زنگ بیلدیریشلرینی گؤروب ناراحات اولموشدو. تلفوندا آناسی‌نین هؤنکورتو ایله: «سن هارداسان آخی؟» -سؤزلرینی ائشیده‌نده اؤز-اؤزونه ایستانبولدان گلن دوستونو یامانلامیشدی. ائله اوندا بیریوللوق باشا دوشموشدو کی، ایکی نفره ۷ لیتر بسدی.
ایندی ایسه بو دوققوز مرتبه‌لینین قارشیسیندا آناسی‌نین سسی قولاغیندا جینگیلده‌ییردی. اینتهاسی، باشقا شئیلری فیکیرلشمک ایسته‌ییردی. ائله بیر شئی کی، بو گونله، داییسی‌نین اؤلومو و اونون خاطیره‌سی ایله علاقه‌‌لی اولماسین، تامام باشقا بیر شئی. مثلا، نییه ایرانلیلار خزر دنیزینه مازانداران گؤلو دئییر؟ یاخود نییه هانسی آیدا «ر» حرفی یوخدورسا همین آی بالیق یئمک اولماز؟
آنجاق ائله بو دقیقه وله‌سین کؤلگه‌سیندن چیخیب داییسی‌گیله قالخسا، مجبور بونلاری تصوّر ائده‌جکدی: داییسی نئجه اؤلوب، اؤلنده نه دئییب، داییسی قیزلاری نه اویون چیخاریرلار، آناسینا باجیسینا بو خبر نئجه وئریلیب، اونلار هانسی وضعيّتده اؤزلرینی بورا یئتیریبلر، جنازه ائودن چیخاندا هانسی معرکه قوپوب مئییتی بو دار پیلله‌کنلرله آشاغی نئجه دوشوروبلر؟ بو خوشاگلمز حادثه‌‌نی تصوّر ائتمک ان پیس شئیی خاطیرلاماقدان ایکی‌قات آغیر گؤرونوردو اونا.
لاپ ایندیجه باشقا بیر شئیی ده دقیقلشدیردی، داییسی‌نین اؤلومو اونون اوچون ساده‌جه خوشاگلمز حادثه ایدی.
حیطده قولاق‌باتیران سس-کویدن سونراکی ساکیتلیک واردی، بیر ساعت اوّلکی چیغیر-باغیردان -اگر بئله بیر صحنه اولموشدوسا- محله‌‌نین یادداشیندا هئچ نه قالمامیشدی. دوققوزمرتبه‌لینین گیریشینده کیمسه گؤزه دگمیردی. مئح اسمیر، یارپاق تیتره‌میر، قوش اوچمور، ماشین کئچمیر، محله دوکانینا موشتری گیرمیر، زیوه‌ده‌کی پالتارلار یئللنمیر، آچیق پنجره‌لردن کوچه‌یه بیر میزیلتی بئله گلیب چاتمیردی. ائله بیل هامینین ال-آیاغی کیلیدلنمیش، نیطقی قوروموشدو. تکجه محله‌‌ده‌کی کیچیک فوتبول مئیدانچاسیندا بالاجا قارا ایت قاپی دیرکلرینین آراسیندا او طرف-بو طرفه قاچیر، هله درسدن قاییتمایان مکتبلیلری یامسیلاییردی.
بو سس‌سیزلیک‌سه اونا بیر آزدان پیلله‌کنلری قالخیب داخیل اولاجاغی منزیلدن داها واهیمه‌لی گلدی، تئز اؤزونو بینانین گیریشیندن ایچری آتدی. ئوده کیمله قارشیلاشاجاغینی و نئجه داورانمالی اولدوغونو تخمین ائتدی. داییسی قیزلاری… یوخ، یقین اونلار جنازه ایله رایونا گئدردیلر، خالالاری قارداشلارینی سون منزیله یولا سالماقدان کیم ساخلایا بیلردی اونلاری؟ بلکه، او بیری داییسی‌نین آرواد-اوشاغی؟.. هه، باخ! بو اولار…
ایکینجی مرتبه‌یه قالخاندا سول قاپی‌نین آرخاسیندان گلن «آااه.. اوفف» سسینی ائشیدیب آیاق ساخلادی. پوخمئل(سرخوشلوقدان سونراکی خومارلیق) اولاندا دؤرد یاندان هوجوما کئچن سئویشمک آرزوسونون سببلری بارده دوشوندو. بیر طرفدن ده، بو ۲۱ نؤمره‌لی منزیلدن گلن سس، بیر آنلیق الینی همین قاپی‌نین جفته‌سینه آتیب ایچری،گ کئچمک، بو سسین صاحبینی گؤرمک ایسته‌دی. گؤره‌سن نئچه یاشی وار؟ کیمینله بیرلیکده‌دیر؟
فیکیرلشدی، اوست مرتبه‌ده‌کی ائوده قونشوسو اؤلسه وای-شوونله اونو بو مرتبه‌لردن دوشوردوب باسدیرماغا آپارسالار، جمعی بیر ساعت سونرا کیمینله‌سه دلی کیمی سئویشه‌بیلرمی؟.. ساغ چیینی ایله بئینی‌نین دوز اورتاسینا اوزانان دامارین ایچینده سانکی قاریشقا گزدییینی گؤرونمز بیر الین دامارلارینی فاصیله‌لرله سیخدیغینی حیسّ ائتدی.
Post #30283
247