یازان :بویوک آغا افندی
سیزدن یاخشی آدام بودونیایا نه گلیب نه ده گله‌جک، مخصوصا جنگ زمانی چوخ غیرتلی، شریف، وطن‌سئوردینیز. خصوصلیه منه ده چوخ بتر ارادتینیز وارایدی، سیزین ارادتینیز منه، دشمنلری محو ائله‌دی، خبرینیز یوخودو والله، آللاه سیزدن اؤتور اولور، سیز اونون چوخ عزیز بنده‌لریسینیز، آللاهین دینینی قورودونوز، اونون دینینین دوشمنلرینین نه‌کی‌وارینی داغیتدینیز. محاربه زمانی یوخسولوغو، قیتلیغی، هرزادی جان-دل ایله تحمل ائله‌دینیز، آخ دا دئمه‌دینیز...
ایندی بیزیم نؤبه‌میزدی سیزه خدمت ائدک. والهی سیزی قیزیلا چولاقاساق آزدی، آمما آلله اوزو شاهیددی گئجه-گوندوز فیکیرلشدیک هئچ اولماسا حقوقلارینیزی تورمه یاخین آرتیراق، اؤزوم اؤلوم، سیز اؤله‌سینیر ایمکانی اولمادی. آخی سیزین حقوقونوزو آرتیراندا تورّم گئدر اوسته، سیزی ناراحت ائدر. سیزین راحاتسیزلیغینیزا دؤزه بیلمه‌دیک، اونا گؤره ده، خیالینیز راحات اولسون، آیلیقلارینیز سیز دئین کیمی آرتمایاجاق. بیر سیرا آغالار-خانیملار هرگون دئییرلر داوا-درمانی بیمه ایله مجانی ائدین واللاه حاق سؤزدو، بیللاه حاق سؤزدو، آمما نئینه‌مک، دولت تامین اجتماعی‌نین بورجونو وئرمه‌ییب. البت دولتین ده تقصیری یوخدو کؤپک‌اوغلو ترامپ قویمور. پوللارینی قطردن، کوره‌دن، اویان بو یاندان آلسینلار. سیز کی ایندییه‌جه دؤزوبسونوز بیر آز دا دؤزون، بیز آمریکا ایله توافق ائدک امریکا کوره‌یه دئسین اویان-بویانا، اونا-بونا دئسین بیزیم پوللاریمیزی گؤندرسینلر قطره-قطره ده وئرسینلر بتره آللاه دئین اولسا، بتر ده تؤکسون بانک مرکزینین حسابینا دولت بانکدان بورج آلسین هم گلیرینیزی آرتیرسین، هم داوا-درمانیزی موفته ائله‌سین. آمما لاپ دا نسیه اولماسین دئییه‌سیزه خدمت ائلمک اوچون فعلا اینترنتی، گازی، برقی، سویو، تلفنی اون قات باهالادیریق انشاللاه هاچان چوخ یاغیش یاغسا، بوتون سدّلر دولسا، دریالار داشسا، یئر آلتینداکی، اوستونده‌کی سولاریمیز ناترازلیقدان چیخسا اونلاری دا اونلاریدا موفته ائده‌جه‌ییک. آللاه سیزی ساخلاسین سیزه هرنه خدمت ائله‌سک واللاه آزدی...
https://t.me/Adabiyyatsevanlar
Post #30285
454