22 нызқь тонна рҟынӡа ацитрустә шәырқәа аԥснынтәи аҳәаа иахыргеит жьҭаарамза аҽеиҩшамҭазы ҳәа иҳәеит Ақыҭанхамҩа аминистр ихаҭыԥуаҩ Дмитри Ҳагәышь ацитрустә аамҭахәҭа аҽазыҟаҵаразы Аминистрцәа реилазаараҿы имҩаԥысуаз аилацәажәараҿы.

Урҭ рҟынтәи 17,8 нызқь тонна — мандариноуп, 4 нызқь — лимонуп.

2026 шықәса раахыс аҭыԥантәи ақыҭанхамҩатә аалыҵ аекспортиорцәа аҳазалхратә еизга ашәара аҟынтәи рхы иақәиҭтәуп.

Аҳынҭқарратә ҳазалхратә еилакы ахантәаҩы ихаҭыԥуаҩ Алиас Лабахәуа иара убасгьы иазгәеиҭеит, аԥснытәии урыстәылатәии агани аҳазалхратә хылаԥшра алҵшәақәеи наҟ-ааҟ реицазхаҵаразы аиқәшаҳаҭра ишалнаршо агәаҭарақәа рырыҩбара аркьаҿра, аҳәаа ахысра арццакра.

Атранспорт оперативла аушьҭразы аҳәааҿы ахархәара рыҭоуп ирӷәӷәоу асменақәа. Аҵиаақәа рчымазарақәа раарԥшраан аспециалистцәа аекспресс-лабораториаҿы аҿырԥштәқәа ранализ мҩаԥыргар рылшоит.

Аԥыза-министр Владимир Делба апрофильтә усбарҭақәа рнапы ианиҵеит амаҵзурақәа еиқәшаҳаҭны русура алдыршаларц, аалыҵ алгараан иҵаҵӷәыдоу ашәарақәеи иԥсабаратәым аиҵахарақәеи алдмыршаларц.

🖇️ Цәыббра 25 рзы Аԥсны Аҳәынҭқарратә ҳазалхратә еилаки Урыстәыла Афедералтә ҳазалхратә маҵзуреи рнапы аҵарҩит аҳазалхратә хылаԥшра алҵшәақәа електронтәхкыла наҟ-ааҟ разхаҵаразы аԥкаанҵа.