Апаллиативтә цхыраара аҿиара иалацәажәеит Аԥсны ахада Бадра Гәынбеи ахосписқәа рыцхырааразы афонд "Агәыӷра" аԥҵаҩы, адиректор, Жәлар рфронт апроект "Аиҷаҳара арегион" автор Ниута Федермессери реиԥылараан.

Аиԥылараҿы иахәаԥшит Аԥсны амедусҳәарҭақәа руак ашьаҭала апаллиативтә цхыраара аҟәша ҷыда аԥҵара, уаҟа еиуеиԥшым ачымазарақәа змоу ауааԥсыра иахәҭоу амедицинатә цхыраареи ахылаԥшреи роур рылшартә еиԥш.

Уи иалнаршоит ҷыдала ахылаԥшра, ахьаа ахгара армариара, аԥсҭазаара ахаҭабзиара аиӷьтәра зызхымԥадатәу апациентцәа комплекстә знеишьала рбара алыршара ҳәа аҳәоит атәыла ахада ипресс-маҵзура адырраҭараҿы.

Аиԥылара рхы аладырхәит Агәабзиарахьчара аминистр Асҭамыр Гәыниеи аминистр ицхырааҩ Алхас Џьынџьали.

Аҳәынҭқарра ахада Агәабзиарахьчара аминистрра анапынҵа аиҭеит, азҵаара аус адуланы иахәҭоу ажәалагалақәа аздырхиарц агәабзиарахьчара асистемеи аԥсуа жәлар рменталитети рҭахрақәа ҳасаб рзуны.