V Жәларбжьаратәи аҵараиурҭабжьара-рҵаратә цәыргақәҵа аартуп ацентр "Ҳара ҳаицуп" аҿы.

Уи иалахәуп урыстәылатәи аҵараиурҭақәа 10 рхаҭарнакцәа.

"Ҳара ҳзы ҳаҭыр дууп аҵаратә системақәеи, академиатә традициақәеи, аҿар ргәазыҳәарақәеи еидызкыло ари акрызҵазкуа аус аиҿкааҩыс ҳахьыҟоу", — иҳәеит Аԥсны иҟоу Россотрудничество Ахаҭарнакра аиҳабы инапынҵақәа назыгӡо Вадим Банников.

Иара иажәақәа рыла, Аԥсны аҿар ареспублика акультура-ҭоурыхтә контекст ҷыда ҳасаб азуны зхаҭабзиара ҳараку аҵара аиуразы алшара роура акраҵанакуеит.

Ацәыргақәҵа аҭааҩцәа ирылшоит урыстәылатәи аҵараиурҭақәа рҭалараз аҭагылазаашьақәа рдырра, арҵаратә программақәа реилкаара, аинтерес змоу азҵаарақәа рыҭира. Жьҭаара 14-16 рзы иазыԥхьагәаҭоуп аӡыргарақәа, аҟазара-классқәа, аинтерактивтә усмҩаԥгатәқәа, аквизқәа.

Аиҿкааҩ — Аԥсны иҟоу Россотрудничество Ахаҭарнакра.