"Сара сеигәырӷьоит атәылаҿы иахьыҟоу аиԥш зеиԥшу, иахьазы Аԥсны еиуеиԥшым аусхкқәа рҿы аспециалистцәа ссирқәа, урҭ рхыԥхьаӡарагьы ахьырацәоу", — ҳәа иҳәеит аицлабра "Аԥсны акоманда" аҿы аиааира згаз ируаӡәку Ерасҭ Ӷәынџьиа.

Иара аекономика аминистрра аинвестициақәеи анаплакратә усуреи рыҟәша аусзуҩыс дыҟоуп. Аицлабра ихы алаирхәырц еицырыӡбеит иҩызцәеи иареи. Ӷәынџьиа иҳәеит апроект ахь дшааз ареспубликаҿы аекспорт хырхарҭа змоу анаплакыҩцәа рыдгыларазы ауснагӡатәқәа рыҿиара аидеиа иманы.

Аелита Ҷанба — "Аԥсны акоманда" аҿы аиааира згаз даҽаӡәы, аилахәыра "Аԥсны-Оил" аусзуҩы иазгәалҭеит аицлабра лхы алалырхәырц шылыӡбаз, избанзар уи актәи ахәҭа алҵшәа бзиақәа ртәы лаҳахьан.

Ҷанба иазгәалҭеит уи ҷыдала аинтерес шлызцәырнагаз аҳәынҭқарратә ҩаӡараҿы иқәгылоу апроблемақәа рыӡбара, иагьацылҵеит апроект алҵшәа хада лара лзы — аибадырра ҿыцқәа шракәу.

"Сара даара сгәы иахәоит сылшарақәа разгәаҭара ахьрылшаз", — ҳәа ацылҵеит лара.
#social