Аԥсны аҭҵаарадыррақәа ракадемиа ахада Зураб Џьапуа Ҭаҭарсҭан Аҭҵаарадыррақәа ракадемиа 35 шықәса ахыҵра азгәаҭара ихы алаирхәит.
Џьапуа идагьы Аԥсни, Узбекистани, Ҟазахсҭани, Кыргызсҭани, Беларуссиеи, егьырҭ атәылақәеи рхаҭарнакцәа злаз аҳәаанырцәтәи асасцәа дырԥылеит ареспублика аиҳабыра араис Русҭам Минниханов, абри атәы аанацҳауеит ААР апресс-маҵзура.
Џьапуа иара убас аиубилеитә еилатәараҿы дықәгылеит. Адныҳәаларатә ажәаҿы иара иазгәеиҭеит Аԥсни Ҭаҭарсҭани рыбжьара аиҩызаратә еимадара ӷәӷәақәа, урҭ шьҭарҵеит ҩ-республикак раԥхьатәи рхадацәа — Владислав Арӡынбеи Минтимер Шаимиеви.
Аҭҵаарадыррақәа ракадемиа ахада иазгәеиҭеит, ареспублика Аԥсны адгылара шанаҭоз аибашьра ашықәсқәа раан, иахьа аусеицура аҿиара ишаҿу еиуеиԥшым ахырхарҭақәа рыла, аҭҵаарадыррагьы налаҵаны.
Post #21361
28
