Дырмит Гәлиа иҩны-музеи аҿы шьаҭанкылатәи аремонт иаарласны ихыркәшахоит, абри атәы Sputnik иазеиҭеиҳәеит аҳәынҭеилахәыра "Аԥсныргылара" аргыларатә усбарҭа аиҳабы Вадим Ладариа.

"Ихадоу аусқәа зегьы ҟаҵоуп, макьана инагӡатәу амаҷ-саҷқәа ыҟоуп. Уажәы ахыбра аҿаԥшылара арҽеиразы аусурақәа ҳарҿуп", — иҳәеит иара.

Иара убас Ладариа иҳәеит аҩнуҵҟатәи аусурақәа хыркәшоуп уҳәар алшоит ҳәа. Аԥенџьырқәеи ашәқәеи ԥсахуп, ҿыц еиҭашьақәдыргылазгьы ыҟоуп.

"Адашьмақәа ықәҵоуп, ицәны алак рыхьшьуп. Шамахамзар ацқьа-ҩычара ахыркәшарахь инеит. Ахаҿра арԥшӡара анхыркәшахалак, иаанхо аанда ашәра, аҩналарҭа арыцқьара, аӡәӡәара роуп. Мызки бжаки рышьҭахь ахыбра ахархәаразы ихиахоит", — ҳәа азгәеиҭеит Ладариа.

🖇 Амузеи ахьыҟоу ахыбра ргылан 1911 шықәсазы. Аҩны-амузеи аартын 1974 шықәсазы, уи аахыс уа ашьаҭанкыла-арҽеиратә усурақәа мҩаԥгамызт. Амузеи аҿы Жәлар рпоет инапылаҩырақәагьы уахь иналаҵаны 20 нызқь инареиҳаны зыхә ҳараку аекспонатқәа ҵәахуп.

Ахыбра аиҭашьақәыргылара иалагеит 2026 шықәса ажьырныҳәамзазы. Аргыларатә план инақәыршәаны уи ашықәс нҵәаанӡа ихыркәшазароуп. Аусура мҩаԥнагоит аҳәынҭеилакы "Аԥсныргылара", аҳәынҭқарратә биуџьет аҟынтәи 38 млн мааҭ азоужьуп.