Тҟәарчал араион аҿы аус зуа 17 школ рҟынтәи 16 школ рҟны ахәыԥха рыҭаразы апрограмма иаҵанакит.

Абри атәы арадио Sputnik иазеиҭалҳәеит Тҟәарчал араион аҵараҟәша аиҳабы Мактина Ҭорҭиаԥҳа.

"Ҳазҭалаз амза 1 инаркны 16 школ рҟынтәи 12 школ рҟны ашколхәыҷқәа ахәыԥха рыдгалоуп, егьырҭ ԥшь-школ рҟны амажәалых, ачаи ма аӡыхаа ацҵаны ирырҭоит. Ахәыԥха амениу ашколқәа ирыднагалеит Аԥсны Аҵара аминистрра, уи асанԥҟарақәа ирықәшәоит", — ҳәа азгәалҭеит лара.

Инарҭбааны аиҿцәажәара шәаҳар шәылшоит Sputnik Аԥсны аҟны.

🖇 Уаанӡа Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко иҳәеит Аԥсны аиҵбыратәи аклассқәа рҵаҩцәа рзы ашколтә крыфарҭақәа рҿы ахәы ԥханы аҟаҵараз Урыстәыла ахада ирезервтә фонд аԥара шазоунажьуа. Владимир Путин иӡбарала арҭ ахықәкқәа ирзоужьхоит 245 млн мааҭ. Апрограмма алыршахоит Урыстәыла аԥаразоужьралеи, Аԥсны абиуџьет аҟынтәи ацхыраареи рыла.
#social