Бадра Гәынба КВН акоманда "Аԥснытәи Нарҭаа" алахәылацәеи иареи инагӡоу апроектқәеи, рыгәҭакқәеи, атәылаҿы КВН аҿиареи ирылацәажәеит.

"Нарҭаа" атәыла ахада иҭабуп ҳәа иарҳәеит иҟаиҵо адгыларазы. Еиҳарак дара иазгәарҭеит Аԥсни Урыстәылеи ркомандақәа рыбжьара ахәмарра Аԥсны амҩаԥгара аҵак ду шамоу.

"Даҽакала иуҳәозар, ари иааиԥмырҟьаӡакәа ҩ-сааҭк Аԥсны аӡыргара акәын", — иҳәеит Ҭеимураз Кәакәасқьыр.

АМИК анапхгара "Аԥснынтәи Нарҭаа" ааԥхьара рырҭеит КВН 65 шықәса ахыҵра иазку аныҳәатә усмҩаԥгатә ахь. Аиубилеи мҩаԥгахоит абҵара 18 рзы Кремль.

Уи адагьы, аиԥылара алахәылацәа атәыла ахада изеиҭарҳәеит, иара иааирԥшуа адгылара иабзоураны Аԥсны КВН алига шхацырку. Ари асезон азы алига иалахәуп шамахамзар Аԥсны араионқәа зегьы рҟынтәи акомандақәа.

Бадра Гәынба иазгәеиҭеит аҿар рзы асеиԥш иҟоу апроектқәа рыҿиара аҵак ду шамоу.

"Шәара иҟашәҵо ҳтәылазы — ӡыргара дууп. Шәбаҩхатәра иабзоураны Аԥсны аӡбахә раҳауеит, атәыла анҭыҵ иӡырыжәгоит. Зегьы ирыцкугьы — шәара ҳҿар рзы шәҿырԥшыгоуп", — иҳәеит Бадра Гәынба.