Адемографиатә шәарҭадара азҵаара аҽазыҟаҵаразы астатистика цқьа аҭахуп ҳәа азгәеиҭеит адепутат Леонид Лакербаиа, Жәлар Реизара аилак аилатәараҿы.

"Астатистика зехьынџьара иҟазароуп. Араҟа амаҷ-саҷ ыҟаӡам, избанзар, иалшоит ара (азакәан апроект "Адемографиатә шәарҭадаразы" аҿы-аред.) иазгәаҭам ахырхарҭақәа цәырҵыр", — иҳәеит иара.

Лакербаиа иажәақәа рыла, зыӡбахә ҳәоу — атәылаҿы аиреи аԥсреи рҭагылазаашьа мацара акәымкәа, акомплекстә знеишьа аҭахуп.

"Иахьа иҳамоу ашьаҭала ҳалагароуп. Аибашьра ашьҭахьтәи ашықәсқәа ирылагӡаны зныкгьы уи аҩыза аус ҟаҳамҵацызт. Иаҭахуп — Аԥсны Аҳәынҭқарра ауааԥсыра шьақәзыргыло инарҭбаау асиа", — иҳәеит иара.