"Аԥсны аҳәынҭқарра адемографиатә шәарҭадаразы" азакәан апроект иахәаԥшуеит Жәлар Реизараҟны иаԥҵоу аилак аилатәараҿы.

"Иҟоуп адемографиатә шәарҭарақәеи апроблематә зҵаарақәеи жәпакы, урҭ зегьы ҳаицхырааны аҳәынҭқарреи уи азы аусбарҭақәеи рыҩаӡарала, асистематә ҟазшьа аҭаны аусура ҳалагароуп", — иҳәеит Жәлар Реизара аиҳабы Лаша Ашәба.

Ашәба иазгәеиҭеит ари аусхк аҟны иҟоу апроблемақәа — аира, аԥсыҭбара, амилаҭ ргәабзиара уҳәа асистематә зҵаарақәа, еиуеиԥшым ачымазара хьанҭақәа раԥырҟәҟәаарагьы уахь иналаҵаны.

Азакәанԥҵаратә аԥшьгара ҟазҵаз адепутат Инар Гыцба иазгәеиҭеит апроект аус шадулоу адемографиатә шәарҭадара аиҿкаара аусхк аҟны иаку аҳәынҭқарратә политика ашьақәыргылара хықәкыс иҟаҵаны.

Азакәан адкылара ҵаҵӷәыс иамоуп:
◽️аира алаҟәра,
◽️ауааԥсыра ԥсабарала рыгхара,
◽️ауааԥсыра ражәра,
◽️атәылауаа рмиграциа,
◽️ аусура зылшо ақәра иаҵанакуа ауааԥсыра рхыԥхьаӡара аиҵахара,
◽️ адемографиатә процессқәа аҳәынҭнапхгара рызҭаша хра злоу асистема аҟамзаара.

Аусшәҟәы раԥхьаӡакәны азакәанԥҵаратә ҩаӡараҿы иҳәаақәнаҵоит адемографиатә шәарҭадара аилкаара, ишьақәнарӷәӷәоит аҳәынҭқарратә демографиатә политика апринцип хадақәа, иарбоу аусхк аҟны аусура мҩаԥызго аусбарҭақәа рсистема, аусбарҭабжьаратә координациа амеханизмқәа, иара убас адемографиатә ҿиара аҳәынҭқарратә программақәа аус рыдулареи рынагӡареи рзинтә шьаҭақәа.

Апроект анагӡара аԥаразоужьра мҩаԥгахоит ареспубликатә биуџьет, аҭыԥантәи абиуџьетқәа, аҳәынҭқарратә биуџьетнҭыҵтә фондқәа, иара убас азакәанԥҵарала ззин ыҟоу арҳамҭақәа рҳәаа иҭагӡаны.