Ацәыргақәҵа "Амшын цәқәырԥаӡом" аус адырулон Урыстәылатәи аҟазаратә галереиа аҭҵаарадырратә ҟәша агәыԥ ҳәа лҳәеит агалереиа аҵарауаҩ-маӡаныҟәгаҩ Викториа Данилиук.

Лара лажәақәа рыла, аҽазыҟаҵараан еилкаахеит Аҳәынҭқарратә аурыс музеигьы Аивазовски ицәыргақәҵа азырхиара ишаҿу, уи иахҟьаны асахьаҭыхыҩ иусумҭақәа рыԥшаара даара ишыуадаҩхаз.

Асахьақәа ахьеиқәхаз ԥшь-музеик рҿы ауп. Петергофтәи амузеи ирнаҭеит зегь реиҳа идуу асахьа – 1882 шықәсазтәи Аивазовски иҭыхымҭа "Парусная лодка в море".

"Ари аҭыхымҭа арахь иаарц азы идуцәан, изҭасаз адаԥа иҭырхыр акәхеит. Анџьныртә ӡбара, аԥенџьыр ала аҩбатәи аихагыла аҟынтәи, аԥенџьыр ҭыганы албаагара зынӡа иџьашьахәуп. Даҽакала иаҳҳәозар, аиашазы, арҭ зегьыдаара иуадаҩу процессын, ҳколлегацәа уи иахьақәшаҳаҭхаз ҳаигәырӷьоит", — лҳәеит лара.

Данилиук лажәақәа рыла, ацәыргақәҵаҿы еиуеиԥшым атематикақәа еилагӡоуп. Амшынтә тема адагьы ицәыргоуп стильлеи, шәыгалеи, темпераментлеи Аԥсны иазааигәоу асоветтәии урыстәылатәии асахьаҭыхыҩцәа русумҭақәа. Ас еиԥш иҟоу асахьақәа иреиуоуп Тогрул Нариманбеков — "Золотое руно", Наталиа Нестерова — "Фотосъемка", Владимир Дубосарскии Александр Виноградови — "Розовые мечты" уҳәа егьырҭгьы.

Ацәыргақәҵа "Амшын цәқәырԥаӡом" аартызаауеит ацәыргақәҵатә зал хадаҿы ԥхынҷкәын 13 рҟынӡа.