Урыстәылатәи аҟазаратә галереиа ацәыргақәҵа "Амшын цәқәырԥаӡом" аатит Аԥсны ацәыргақәҵатә зал хадаҿы.

Аекспозициаҿы ицәыргоуп Урыстәыла афедералтә музеиқәа хәбеи арегионалтә музеиқәа хԥеи реизгақәа рҟынтәи аурыс ҿыханҵа арҿиамҭақәа 35.

"Иазгәаҭатәуп, Урыстәыла Акультура аминистрра ацхыраарала Урыстәылатәи аҟазаратә галереиа ари ацәыргақәҵа ҷыдала Аԥсны азы ишазырхиоу. Даҽакала иаҳҳәозар, ас еиԥш аилазаареи ас еиԥш аишьҭагылашьеи рыла уи ҽаџьара ижәбаӡом", — ҳәа азгәалҭеит АЗХ адиректор Ельвира Арсалиаԥҳа.

Лара лажәақәа рыла, аиҿкааҩцәа ацәыргақәҵатә ҵакыра рыԥсахит — архитектуратә ргылара ҟарҵеит, аҭӡамцқәа рыԥштәы, анавигациа рыԥсахит. Аҭааҩцәа рзгьы иазԥхьагәаҭоуп абжьыгид.

Аԥсны раԥхьаӡакәны ицәыргоуп: Иван Аивазовски иусумҭақәа "Море", "Туманное утро", "Закат на море", "Лунная ночь в Крыму", "Парусная лодка в море".

Иара убасгьы ацәыргақәҵаҿы Валентин Серов, Константин Богаевски, Георги Нисски, Таир Салахов, Наталиа Нестерова, Владимир Дубосарски уҳәа еицырдыруа асахьаҭыхыҩцәа рсахьақәа цәыргоуп.

Аекспозициа иахаҿсахьа хадоуп Амшын еиқәа – агәалашәареи, амифи, алашареи, агәацԥыҳәареи реиужьра, аҭынчреи аҩныҵҟатә еиқәшаҳаҭреи рҭыԥ аҳасаб ала.

Ацәыргақәҵа аартуп ԥхынҷкәын 13 рҟынӡа.