Аԥсуа-аурыс еизыҟазаашьақәа зеиԥш ҟамлац аҭоурыхтә ҩаӡараҿ иҟоуп ҳәа азгәеиҭеит Аԥсны Адәныҟатәи аусқәа рминистр Олег Барцыц.

Урыстәылатәи иколлега Сергеи Лаврови иареи реиԥылараан, Барцыц иазгәеиҭеит ҩышықәса ирылагӡан Бадра Гәынбеи Владимир Путини реиԥыларақәа хԥеи, Аԥсни Урыстәылеи рыдәныҟатәи аусқәа рминистрра ахадацәа реиԥыларақәа хԥеи шымҩаԥысхьо атәы.

"Уи, ҳәарада, зымҽхак ҭбаау, даара хра злоу ҳусеицура анырра анаҭоит", — иҳәеит иара.

Ҩ-ганктәи аусеицура ахырхарҭақәа зегьы Аԥсны жәлар рзы акырӡа аҵанакуеит. Барцыц хазы иаликааит аекономикатә еинырра, аинфраструктуратә проектқәа рынагӡара. Зегь реиҳа зымҽхак ҭбаау иреиуоуп ареспубликеи Урыстәыла арегионқәеи рыбжьара аҳаиреимадара абжьаҵара. Уи иабзоураны лаҵарамза 1 инаркны Аҟәатәи аҳаирбаӷәаза 200 нызқьҩык иреиҳаны апассаџьырцәа рымаҵ аухьеит.