Бадра Гәынба аԥсуа культуратә центрқәа Рфедерациа ахада Иауз Аҭрышба зхадараҿы дыҟоу Ҭырқәтәылантәи аԥсуа диаспора рделегациа дырԥылеит.

Гәынба ареспублика анҭыҵ инхо ҳџьынџьуааи ҳареи ҳаимадара аҵак ҷыда шамоу азгәеиҭеит.

"Ҳдиаспореи ҳареи ҳаимадара ҳара ҳзы аҵак ҷыда амоуп. Ҳахьынхозаалакгьы, ԥсадгьылк, иаҳзеиԥшу аҭоурых, иаҳзеиԥшу адацқәа ҳамоуп. Ҳара зегьы ҳаицхырааны ихьыԥшым ҳаԥсуа ҳәынҭқарра ҳаргылалароуп, иҳарӷәӷәароуп", — иҳәеит Бадра Гәынба.

Иара убасгьы адиаспора иҭабуп ҳәа реиҳәеит абызшәеи, акультуреи, амилаҭтә традициақәеи реиқәырхаразы, асасцәа Аиааира ашықәсхыҵра рыдиныҳәалеит, ирзеиӷьеишьеит аҭынчреи аизҳазыӷьареи.