Аԥсны ихәыда-ԥсадоу амедицина аиқәыршәаразы шықәсык аҩнуҵҟа 5 млрд мааҭ рҟынӡа аҭаххар ҟалоит.

Абри атәы арадио Sputnik аефир аҟны еиҭеиҳәеит Аԥсны Агәабзиарахьчара аминистр ихаҭыԥуаҩ Олег Оҭырба.

Иара иажәақәа рыла, иахьа аҳәынҭқарра ауааԥсыра рыхәышәтәразы аԥара рацәа азынанашьҭуеит:

️ ️▪️200-250 млн мааҭ – ареспублика анҭыҵ ахәшәтәразы;

️ ️ ▪️120 -130 млн рҟынӡа – ахимиотерапиа азы;
️ ️ 60 млн рҟынӡа – агемодиализ азы.

Ус шакәугьы аԥара азхом, апрограммақәа рырҭбаара хымԥадатәиуп. Апациентцәа астационарқәа рҿы хәшәыла реиқәыршәарагьы иара убас инагӡаны ҳалацәажәозар изалыршахаӡом.

"Арҭ апациентцәа инагӡаны хәшәыла реиқәыршәара азҵаара, хәыда-ԥсадатәи амедицина амодель ҳрылацәажәозар, зегьы иреиҵаӡоу ҳаԥхьаӡарақәа рыла 5 млрд рҟынӡа аԥара аҭахуп", — азгәеиҭеит иара.

Оҭырба игәаанагарала, иахьатәи аҭагылазаашьақәа рыла, зынӡа ихәыда-ԥсадоу амедицина аиқәыршәара залыршахом.