«Беларусы дзеяньня» і «Воля» прапанавалі КР вызначыць абсалютныя прыярытэты фінансаваньня

Фракцыі «Беларусы дзеяньня» і «Воля» ўнесьлі ў Каардынацыйную раду праект рэзалюцыі пра прыярытэты фінансаваньня беларускай дэмакратычнай супольнасьці.

Праект зыходзіць з простага прынцыпу: ва ўмовах абмежаваных рэсурсаў першачарговую падтрымку павінны атрымліваць тыя, хто непасрэдна нясе найбольшы асабісты і арганізацыйны кошт у барацьбе за свабоду, незалежнасьць і суб’ектнасьць Беларусі.

Прапануецца вызначыць абсалютным прыярытэтам фінансаваньня:

• беларускіх дабраахвотнікаў, якія ўдзельнічаюць у абароне Ўкраіны і супрацьстаяньні расейскай агрэсіі;
• беларускія структуры кіберсупраціву;
• палітычных зьняволеных і іх сем’і;
• былых дабраахвотнікаў, параненых, асобаў з інваліднасьцю, атрыманай у выніку ўдзелу ў супраціве, а таксама сем’і загінулых.

Іншыя напрамкі прапануецца фінансаваць пасьля задавальненьня першачарговых патрэбаў гэтых катэгорыяў. Пры разьмеркаваньні рэсурсаў перавага павінна аддавацца праграмам, якія непасрэдна ўзмацняюць здольнасьць беларусаў супрацьстаяць рэпрэсіям і расейскай агрэсіі, абараняць людзей і аднаўляць беларускую дзяржаўную суб’ектнасьць.

Фракцыі прапануюць улічыць гэтую пазыцыю ў выніковых рэкамэндацыях КР па ацэнцы патрэбаў беларускай дэмакратычнай супольнасьці на 2027–2029 гады.

Галасаваньне па праекце рэзалюцыі прапануецца правесьці 6 кастрычніка.

Для нас прыярытэты пачынаюцца не са структураў, а зь людзей, якія ўжо заплацілі за барацьбу свабодай, здароўем або жыцьцём.