«دوراق» ایلک باشدا «کیتاب تانیتیمی» اوچون آچیلمیشدی. سونرا هر هانسی قونودا یازدیقلاریمی و بعضن دوستلارین یازیلارینی بوردا پایلاشماق قرارینا گلدیم. کانالین آدینی دوراق سئچدیم.
بو دوراقدا بیزیمله یول بیر اولون 🤍☺️
داشین یئرینه سؤزو سئچن آدام
✍🏻دوراق
@Kitabtanitimi
ریوایت وار بیر زامانلار ایکی قبیله یوز ایل بیر-بیرینین قانینی تؤکوبموش‌لر. بیر گون قوجا بیر کیشی اونلارین آراسینا بیر سفره سریب دئمیشدی: گلین اوتورون، بیر-بیرینیزین سؤزونو دینله‌یین. قبیله‌لردن بیرینین باشچیسی سفره‌یه باخیب، قالخیب گئدرک آردینجا دئمیشدی دوشمانیمین سؤزونو ائشیتمک منیم شرفیمه سیغماز. سفره‌ده قالان بوش یئره سونرا داها سؤز اوتورمایب، قیلینج اوتورموشدو. بو گون‌لر دونیانین سیاسی کورسولرینده ائله‌جه ده ایدمان میدانلاریندا او بوش یئر یئنه گؤرونور.
بی‌ام‌ت-نین زالیندا بیر چیخیشچی میکروفون آرخاسینا چیخاندا فرقلی اؤلکه‌لرین نماینده‌لیک‌لری یئرلریندن قالخیب زالدان چیخماسی عادی بیر منظره‌یه چئوریلیب. سیاستین بو چیرکین اوزو ایدمانا دا یانسییب. بیر سیرا ایدمانچیلار میداندا ایستمه‌دیک‌لری رقیبله قارشیلاشماقدان، حتی الینی سیخماقدان چکینیب ایدمانین باریشجیل اوزونو زده‌له‌ییرلر. بیزجه بو داورانیشلار، ایشلرین ان آلچاق و ان سوییه‌سیزی ساییلیر. چونکی سؤزدن قاچان آدام ایکی یولدان بیرینی سئچیر: یا دوشمانین سؤزونو جاوابسیز بوراخار، یا دا جاوابی باشقا بیر دیله، باشقا بیر کسه تاپشیرار. هر ایکیسینده ده یانلیش آنلاشمالار و ترسه باشا دوشمه‌لره یول آچار.
فروید دئمیشدی مدنیت ایلک اینسانین دوشمنینه داش آتماق یئرینه سؤیوش وئرمه‌سی ایله باشلادی. یعنی اینسان ان آزی قتل بویدا جنایتی بوراخیب کلمه‌نی سیلاحا چئویره‌رک مدنی‌لشدی. سؤیوش نه قدر کوبود اولسا دا سؤزون ایلک آددیمی‌دیر، سؤزدن قاچیب زالدان چیخماق ایسه داشا دوغرو قاییدان گئری آددیم‌دیر. دوشمانلار آراسیندا سکوت داشین اؤن آشاماسی‌دیر. سوسدورماغین ان سون شکلی اؤلدورمک‌دیر و زالی ترک ائدن او یولون ایلک آددیمینی آتیر. تورات‌دا یازیب ابراهیم سئدومون طالعی بارده حؤکم صاحبی ایله بئله دانیشدی، اللی صالحدن باشلاییب سایی اونا قدر ائندیردی. حق‌له بنده‌نین سؤزلشمه‌سی مومکوندورسه، اینسانلا اینسانین سؤزلشمه‌سی نه اوچون مومکون اولماسین؟
۱۹۱۴-جو ایلین میلاد گئجه‌سی آلدرشات سنگرلرینده آلمان و اینگیلیس عسگرلری آتشی کسیب بیرلیکده فوتبال اوینادیلار. بیر نئچه گون سونرا ایسه یئنه آتیشا باشلادیلار، آمما او گئجه محاربه‌نین ایچیندن بوی وئرن اینسانلیغین شاهیدی کیمی یاددا قالدی. قدیم یونانلار اولمپیک اویونلاری یاخینلاشاندا شهر-دؤولت‌لر آراسیندا ایدمانچیلار تهلوکه‌سیز یول گئدیب گلسین‌لر دئیه ساواشی دایاندیراردیلار. ۱۹۳۶-دا بئرلینده هیتلئرین استادیومونا چیخان جسی آوونز دؤرد قیزیل مدال قازاندی و نفرته جاوابی اونون آیاقلاری وئردی.
آذربایجان نماینده‌لری دوشمانی اولان ارمنیستان نماینده‌لری دانیشاندا بئله بی ام ت-نین مجلیسینی ترک ائتمه‌ییب. ایکی دؤولت بیر-بیرینی دوشمن ساییرسا دا نماینده‌لری عینی زالدا اوتوروب سؤزو سونا قدر ائشیدیب‌لر. اونلارین باشچیلاری دا دفعه‌لرجه گؤروشلرده بیر بیریله ال وئریب دانیشیقلار آپاردیلار. بوگون او اسکی دوشمانلیق یئرینی اقتصادی آنلاشمالارا وئرمک‌ده‌دیر. دوشمانی قارشیسیندا اوتوروب دینله‌مه‌یی باجاران بیر دؤولت نماینده‌سی وارسا، بللی اولان بودور کی او دؤولتده عقلانیت وار. زالدان چیخماق منه گؤره دهشتلی بیر تپکی‌دیر. دینله‌مک گوجلو اولانین ایشی‌دیر. ان آزی اؤلکه باشچیلاری، فرقلی میللت‌لرین نماینده‌لری و ضیالیلاری بو سایاق داورانمامالی‌دیرلار. سؤزو ماسادا قویوب گئده‌نین آردینجا ساواش گلر. ماسانین آلتینا یومروق ووران ال بیر گون قیلینجا اوزانار، مدنیت ایسه ماسانین اوستونه یوخسا ماسانین آلتینا اوزانان او ایکی ال آراسینداکی فرقی بللی اولان سؤزدور.
✍🏻دوراق
@Kitabtanitimi
ریوایت وار بیر زامانلار ایکی قبیله یوز ایل بیر-بیرینین قانینی تؤکوبموش‌لر. بیر گون قوجا بیر کیشی اونلارین آراسینا بیر سفره سریب دئمیشدی: گلین اوتورون، بیر-بیرینیزین سؤزونو دینله‌یین. قبیله‌لردن بیرینین باشچیسی سفره‌یه باخیب، قالخیب گئدرک آردینجا دئمیشدی دوشمانیمین سؤزونو ائشیتمک منیم شرفیمه سیغماز. سفره‌ده قالان بوش یئره سونرا داها سؤز اوتورمایب، قیلینج اوتورموشدو. بو گون‌لر دونیانین سیاسی کورسولرینده ائله‌جه ده ایدمان میدانلاریندا او بوش یئر یئنه گؤرونور.
بی‌ام‌ت-نین زالیندا بیر چیخیشچی میکروفون آرخاسینا چیخاندا فرقلی اؤلکه‌لرین نماینده‌لیک‌لری یئرلریندن قالخیب زالدان چیخماسی عادی بیر منظره‌یه چئوریلیب. سیاستین بو چیرکین اوزو ایدمانا دا یانسییب. بیر سیرا ایدمانچیلار میداندا ایستمه‌دیک‌لری رقیبله قارشیلاشماقدان، حتی الینی سیخماقدان چکینیب ایدمانین باریشجیل اوزونو زده‌له‌ییرلر. بیزجه بو داورانیشلار، ایشلرین ان آلچاق و ان سوییه‌سیزی ساییلیر. چونکی سؤزدن قاچان آدام ایکی یولدان بیرینی سئچیر: یا دوشمانین سؤزونو جاوابسیز بوراخار، یا دا جاوابی باشقا بیر دیله، باشقا بیر کسه تاپشیرار. هر ایکیسینده ده یانلیش آنلاشمالار و ترسه باشا دوشمه‌لره یول آچار.
فروید دئمیشدی مدنیت ایلک اینسانین دوشمنینه داش آتماق یئرینه سؤیوش وئرمه‌سی ایله باشلادی. یعنی اینسان ان آزی قتل بویدا جنایتی بوراخیب کلمه‌نی سیلاحا چئویره‌رک مدنی‌لشدی. سؤیوش نه قدر کوبود اولسا دا سؤزون ایلک آددیمی‌دیر، سؤزدن قاچیب زالدان چیخماق ایسه داشا دوغرو قاییدان گئری آددیم‌دیر. دوشمانلار آراسیندا سکوت داشین اؤن آشاماسی‌دیر. سوسدورماغین ان سون شکلی اؤلدورمک‌دیر و زالی ترک ائدن او یولون ایلک آددیمینی آتیر. تورات‌دا یازیب ابراهیم سئدومون طالعی بارده حؤکم صاحبی ایله بئله دانیشدی، اللی صالحدن باشلاییب سایی اونا قدر ائندیردی. حق‌له بنده‌نین سؤزلشمه‌سی مومکوندورسه، اینسانلا اینسانین سؤزلشمه‌سی نه اوچون مومکون اولماسین؟
۱۹۱۴-جو ایلین میلاد گئجه‌سی آلدرشات سنگرلرینده آلمان و اینگیلیس عسگرلری آتشی کسیب بیرلیکده فوتبال اوینادیلار. بیر نئچه گون سونرا ایسه یئنه آتیشا باشلادیلار، آمما او گئجه محاربه‌نین ایچیندن بوی وئرن اینسانلیغین شاهیدی کیمی یاددا قالدی. قدیم یونانلار اولمپیک اویونلاری یاخینلاشاندا شهر-دؤولت‌لر آراسیندا ایدمانچیلار تهلوکه‌سیز یول گئدیب گلسین‌لر دئیه ساواشی دایاندیراردیلار. ۱۹۳۶-دا بئرلینده هیتلئرین استادیومونا چیخان جسی آوونز دؤرد قیزیل مدال قازاندی و نفرته جاوابی اونون آیاقلاری وئردی.
آذربایجان نماینده‌لری دوشمانی اولان ارمنیستان نماینده‌لری دانیشاندا بئله بی ام ت-نین مجلیسینی ترک ائتمه‌ییب. ایکی دؤولت بیر-بیرینی دوشمن ساییرسا دا نماینده‌لری عینی زالدا اوتوروب سؤزو سونا قدر ائشیدیب‌لر. اونلارین باشچیلاری دا دفعه‌لرجه گؤروشلرده بیر بیریله ال وئریب دانیشیقلار آپاردیلار. بوگون او اسکی دوشمانلیق یئرینی اقتصادی آنلاشمالارا وئرمک‌ده‌دیر. دوشمانی قارشیسیندا اوتوروب دینله‌مه‌یی باجاران بیر دؤولت نماینده‌سی وارسا، بللی اولان بودور کی او دؤولتده عقلانیت وار. زالدان چیخماق منه گؤره دهشتلی بیر تپکی‌دیر. دینله‌مک گوجلو اولانین ایشی‌دیر. ان آزی اؤلکه باشچیلاری، فرقلی میللت‌لرین نماینده‌لری و ضیالیلاری بو سایاق داورانمامالی‌دیرلار. سؤزو ماسادا قویوب گئده‌نین آردینجا ساواش گلر. ماسانین آلتینا یومروق ووران ال بیر گون قیلینجا اوزانار، مدنیت ایسه ماسانین اوستونه یوخسا ماسانین آلتینا اوزانان او ایکی ال آراسینداکی فرقی بللی اولان سؤزدور.
- ❤ 1
