پزشکیانین دانیشیغیندان بازارین رئاکسیاسینا
✍🏻دوراق
@kitabtanitimi
بازار یالان بیلمز. سؤز آدامینین دیلینه مین دون گئییندیرمک اولار، دولارین و قیزیلین قیمتینه ایسه بیر دون دا دوشمز. دونن پزشکیان سازمان مللین منبرینه چیخمامیشدان قاباق بازار، یاغیش قوخوسو آلان چوبان کیمی، باشینی قالدیریب گؤیه باخیردی. گئدیشات، دانیشیق و آنلاشما گؤستریردی. دولار ایله قیزیل تؤکولمه‌یه، اوزون سورن بؤحرانین ایچینده کیچیک بیر اومود ایشیغی‌نین یارانماسینا آماده‌لشیردی، سانکی بو دفعه نه ایسه باشقا جور اولاجاقدی. سونرا دانیشیق باشلادی، دانیشیق بیتدی و بازار اؤز آجی رئاللیغی ایله بو قیسا عؤمورلو رویایا سون قویاراق تره‌زی یئنه یوخاری قالخدی.
اینجیلده بیر صحنه وار: عیسی بیر اؤلو ائوینین آستاناسینا گلنده نی چالانلاری و های-کوی سالان ازدحامی گؤرور. دئمک کی بیزیم ده قاپیمیزدا نی چالانلار تاپیلیب. دیریلیش ارتوغرول سریالینین موسیقیسینی دانیشیغین آرخاسینا قوشوب، گؤردونوزمو پزشکیان نه گؤزل دانیشدی دئیه هاوار سالیرلار و بونونلا بوش های-کوی یارادیب سئوینجین زیروه‌سینه چاتیرلار. بو باشینی قارا سوخان کهلیک سایاغی اؤزونو-آلداتمانین ان آجی وئرسییاسی‌دیر.
دانیشیغی دینله‌دیم، آچیغی چوخ مأیوس ائدیجی ایدی. آغیر بیر فلاکتین ایچینده اولدوغوموز حالدا، داها بترلرینه حاضیرلانمالی اولدوغوموز نظره گلیر. یوسف پیغمبر یئددی آریق اینه‌یین یئددی کؤک اینه‌یی یئدیگی یوخونو یوزاندا آنبار تیکدیردی. بیزیم یوخوموز کؤک ایل‌لر گؤسترمیر، آریق ایل‌لرین آردینجا داها آریق ایل‌لر گلیر. آنباریمیزی بوغدا ایله دولدورماق الیمیزدن گلمسه بئله، بو دردی بیر-بیریمیزله بؤلوشدوروب پایلاشماق، ساوادی آرتیرماق، گؤزوموزو آچیق ساخلاماق الیمیزده‌دیر. نی سسی کسیلنده قولاق یئنه بازارا دؤنه‌جک، بازار ایسه هر زامان عئینی سؤزو دئییر. قاپینی دؤیَن یاغیشدان دا بتر اولا بیلر، دامجیلایان دامی ایندیدن یوخلایاق.
Post #2489
156
- ❤ 5