بیر ایل اؤنجه‌نین یازیسی‌دیر
✍🏻دوراق
@kitabtanitimi
بیر سیرا گون‌لر وار سانکی یارالاریمیزا یئنی‌دن دوز باسیلیر! بعضن ده بیز اؤزوموز اونودولماسین دئیه بو بیتیشمز یارامیزی آچیب یئنی‌دن قاناتمالیییق. «مهر»-ین بیری او گون‌لردن بیری حساب اولور منجه.
انسانین کؤکو، اونون وارلیغی‌نین آیریلماز بیر پارچاسی‌دیر. آنا دیلی‌نین شیرینلیگی، ائل-اوبانین ایستیلیگی و دوغما یوردون تورپاغی‌نین عطری، اینسانین روحونا ایشله‌ین دویغولاردیر. بو، زورلا اؤیره‌نیلن یا دا سونرادان قازانیلان بیر شئی دئییل؛ اینسانین قانی ایله، جانی ایله بیرلیکده دوغولان بیر سئوگی‌دیر.
آنجاق بعضاً بو ان دوغال و صاف دویغو، یاد باخیش‌لارلا قارشیلانیر. نییه اؤز دیلینده دانیشاندا، اؤز کئچمیشینی خاطیرلایاندا، بعضی‌لری‌نین گؤزونده بیر تهدید کیمی گؤرونورسن؟ سانکی اوره‌گینده‌کی بو سئوگینی دیله گتیرمک، باشقالارینا قارشی بیر نیفرت ایمیش کیمی یوزولور. حاققینی آختاراندا، سسینی “گرکسیز بیر گورولتو” کیمی سوسدورماغا چالیشیرلار.
ان آغیری دا بودور، سنین ان صمیمی حیس‌لرین، ان بؤیوک گوناه کیمی تقدیم ائدیلیر. وطن اوچون چیرپینان بیر اوره‌گه، فیتنه‌کار دامغاسی وورولور. دردینه درمان آختارارکن، “سوس و یئرینده اوتور” جاوابی وئریلیر و اؤز کیملیگینه وفادارلیغین گؤرمزدن گلینیر.
آخی، سوروشان یوخدور اؤز ائلینی، اؤز یوردونو سئومک، نه واختدان بری باغیشلانماز بیر سوچ ساییلیر؟ اؤز کیملیگینه صاحب چیخماغین جزاسی، نییه بو قدر آغیر اولمالی‌دیر؟ بو سوال‌لار، اینسانین ویجدانیندا درین بیر یارا آچیر و او یارانین جاوابینی تاپماق، بلکه ده ان بؤیوک موباریزه‌دیر.
البته واختی ایله آذربایجانین فداکار اوغول‌لاری ١٣٢۴ده دیلیمیزین توخومونو هانسیسا چتین‌لیک‌لره قاتلاشدیقلارینا باخمایاراق اکیب قانلاری باهاسیلا اونو قورودولار. او توخوم، هله ده تورپاغین ساکیت و قارانلیق اوره‌یینده، صبیرله اؤز فصیلینی گؤزله‌ییر. او، بیر ایللیک باهارین بوتون خاطیره‌سینی، آنا دیلینده‌کی نغمه‌لرین شیره‌سینی و آزادلیغین قیسا، آمما درین دادینی اؤزونده ساخلاییر. اونو باسدیرماق ایسته‌ینلر بیلمیرلر، تورپاق اونون دوشمنی دئییل، آناسی‌دیر و هر قارانلیق، اونو چوروتمک یئرینه، گله‌جکده‌کی گؤیرتی‌یه داها آرتیق گوج وئره‌جک‌دیر.