Альфред Нобель истәлегенә булдырылган бүләккә быел американ галимнәре Роберт Һолл (83) һәм Майкл Вудфорд (71) лаек дип табылды.
Швеция фәннәр академиясе белдерүендә әйтелгәнчә, бүләк аларга "макроикътисади тотрыклылыкның микроикътисади нигезләре өчен" бирелә.
Һолл һәм Вудфорд яңа макроикътисади модельләр эшләгән. Бу модельләр икътисадтагы тотрыклылыкны саклау өчен нәтиҗәле чаралар күрү мөмкинлеген шактый киңәйткән.
Әлеге модельләр нигезендә, дәүләт чыгымнары һәм салымнар, шулай ук акча әйләнеше һәм процент ставкалары белән бәйле чаралар вакытында күрелсә, икътисадның артык кызуын да, кискен акрынаюын да йомшартырга мөмкин, диелә белдерүдә.
Роберт Һолл (Robert Hall) 1943 елда Пало Алто шәһәрендә туган. Берклидагы Калифорния университетында икътисад бакалавры (1964), Массачусетс технология институтында икътисад фәннәре докторы (1967) дәрәҗәсен алган. Стэнфорд университетында икътисад профессоры.
Майкл Вудфорд (Michael Woodford) 1955 елда Чикопи шәһәрендә туган. Чикаго университетында бакалавр (1977), Йель хокук мәктәбендә хокук докторы (1980), Массачусетс технология институтында икътисад докторы (1983) дәрәҗәсен алган. Нью-Йорктагы Колумбия университетында икътисад профессоры.
▪️2025 елда икътисад фәннәре өлкәсендә Нобель бүләге Джоэл Мокир (АКШ), Филипп Агион (Франция) һәм Питер Хоуитка (АКШ) "инновациягә нигезләнгән икътисади үсешне аңлаткан өчен" бирелде.
▪️Икътисад фәннәре өлкәсендә бүләкне Швеция дәүләт банкы Альфред Нобель истәлегенә 1968 елда оештырды. Җиңүчене Швеция фәннәр академиясе билгели.
▪️Икътисад фәннәре өлкәсендәге бүләк Нобель атнасын тәмамлый. Бүләкләр Альфред Нобель үлгән көнне – 10 декабрьдә тапшырылачак.
Сурәт: The Nobel Prize / X
#НобельБүләге #NobelPrize
Хәбәрләрне безнең Max каналында да күзәтеп бара аласыз.
TatSoft | @ipsanr