KazanForum кысаларында "NLP өлкәсендә ясалма интеллект: бүгенге хәле һәм перспективалар" дип аталган махсус сессия узды

ТР Фәннәр академиясе оештырган чарада Мәскәүнең Бауман университеты, AIRI институты, Л.Гумилев исемендәге Евразия университеты, М.Олугбәк исемендәге Үзбәкстан университеты белгечләре катнашты.

Алар текст эшкәртүнең яңа методлары һәм алгоритмнары турында фикер алышты. Тирән өйрәтү һәм нейрочелтәр технологияләре ярдәмендә ясалган бу методлар процессларны автоматлаштыру, кулланучылар белән аралашуны яхшырту һәм зур күләмле мәгълүматны анализлауда кулланыла.

Чарада катнашучыларга сәламләү сүзе белән ТР Фәннәр академиясе президенты Рифкать Миңнеханов мөрәҗәгать итте. Ул бу алдынгы технологияләрне үзләштерүгә яшьләрне активрак җәлеп итәргә өндәде.

Сессиядә күпмәгънәле һәм контекстуаль тезмәләрне эшкәртү, машина тәрҗемәсенең төгәллеген яхшырту һәм күптелле модельләр булдыру мәсьәләләре турында чыгышлар яңгырады.

Каналга язылу | TatSoft bot