သံဖြူဇရပ် အမှတ် (၁) အခြေခံပညာအထက်တန်းကျောင်း (၁၂) ကြိမ်မြောက် အာစရိယပူဇော်ပွဲကျင်းပနိုင်ရေး ညှိနှိုင်းအစည်းအဝေး ကျင်းပ

မော်လမြိုင် အောက်တိုဘာ ၄

မွန်ပြည်နယ်၊ မော်လမြိုင်ခရိုင်၊ သံဖြူဇရပ်မြို့နယ် အမှတ် (၁) အခြေခံပညာအထက်တန်းကျောင်း၏ (၁၂) ကြိမ်မြောက် အာစရိယပူဇော်ပွဲ အောင်မြင်စွာ ကျင်းပပြုလုပ်နိုင်ရေးအတွက် လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းက မော်လမြိုင်မြို့၊ ပြည်နယ်ဥပဒေချုပ်ရုံး အစည်းအဝေးခန်းမ၌ ကျင်းပရာ မွန်ပြည်နယ်အစိုးရအဖွဲ့ စီမံကိန်း၊ စီးပွားရေးနှင့်ဘဏ္ဍာရေးဝန်ကြီး လျှပ်စစ်၊ စွမ်းအင်၊ စက်မှုနှင့်လမ်းပန်းဆက်သွယ်ရေးဝန်ကြီး ဦးဇေယျာဦး၊ ပြည်နယ်ဥပဒေချုပ် ဒေါ်မိသန္တာမြင့်နှင့် ဖိတ်ကြားထားသောဧည့်သည်တော်များ တက်ရောက်သည်။

ဦးစွာ အစည်းအဝေးတွင် အာစရိယပူဇော်ပွဲဖြစ်မြောက်ရေးကော်မတီ နာယကနှင့်ဥက္ကဋ္ဌတို့က အဖွင့်အမှာစကား ပြောကြားခဲ့ပြီး ယခင်နှစ်များက ကျင်းပခဲ့သည့် အာစရိယပူဇော်ပွဲအတွေ့အကြုံများနှင့် ယခုနှစ် (၁၂) ကြိမ်မြောက်ပူဇော်ပွဲကို ကျင်းပနိုင်ရေးဆိုင်ရာရည်ရွယ်ချက်များကို ရှင်းလင်းပြောကြားသည်။

ထို့နောက် တက်ရောက်လာကြသည့် ပြည်နယ်ဝန်ကြများနှင့်ကျောင်းအကျိုးတော်ဆောင်များ၊ ကျောင်းသားဟောင်းများ အသင်းဝင်များနှင့် ဆရာ/ ဆရာမများက ကန်တော့ခံအငြိမ်းစားဆရာကြီး၊ ဆရာမကြီးများအား ဖိတ်ကြားရေး၊ ပူဇော်ကန်တော့ပစ္စည်းနှင့် အလှူငွေများ ကောက်ခံရရှိမှုအခြေအနေ၊ ပွဲကျင်းပမည့် ရက်စွဲနှင့် အစီအစဉ်များ၊ ဧည့်ခံကျွေးမွေးရေး၊ ဘဏ္ဍာရေးဆိုင်ရာကိစ္စရပ်များနှင့် ပြန်ကြားရေးလုပ်ငန်းစဉ်များကို ကဏ္ဍတစ်ခုချင်းအလိုက် အသေးစိတ် ဝိုင်းဝန်းဆွေးနွေး တင်ပြကြသည်။

ဆက်လက်၍ အာစရိယပူဇော်ပွဲအတွက် အလှူငွေများ ပေးအပ်လှူဒါန်းပွဲကို ကျင်းပရာ စေတနာရှင် ကျောင်းသားဟောင်းများနှင့် အလှူရှင်များက ပူဇော်ပွဲအတွက် အလှူငွေများကို ပေးအပ်လှူဒါန်းကြရာ ဖြစ်မြောက်ရေးကော်မတီ တာဝန်ရှိသူများက လက်ခံရယူခဲ့သည်။

ယင်းနောက် ဖြစ်မြောက်ရေးကော်မတီ တာဝန်ရှိသူများက တင်ပြချက်များအပေါ် လိုအပ်သည်များကို ဖြည့်စွက်ညှိနှိုင်းပေးခဲ့ပြီး (၁၂) ကြိမ်မြောက် မြတ်ဆရာပူဇော်ပွဲကြီး အောင်မြင်စွာ ကျင်းပနိုင်ရေးအတွက် တာဝန်အသီးသီး ခွဲဝေအပ်နှင်းခဲ့ကြသည်။

အဆိုပါ (၁၂) ကြိမ်မြောက် အာစရိယပူဇော်ပွဲကြီးသည် အမိကျောင်းတော်ကြီးတွင် ပညာသင်ကြားခဲ့ကြသည့် ပြည်တွင်း/ပြည်ပရှိ ကျောင်းသား၊ ကျောင်းသူဟောင်းများ အားလုံးနှင့်သက်ဆိုင်သည့် ပူဇော်ပွဲကြီးဖြစ်သဖြင့် အဝေးရောက် ကျောင်းသားဟောင်းများအနေဖြင့်လည်း ပါဝင်လှူဒါန်း ကုသိုလ်ယူနိုင်ပါကြောင်း သိရသည်။

စည်သူ(ပြန်/ဆက်)

https://t.me/iprdrnd/210663

MOI News Application အား အောက်ပါ link တွင် Download ပြုလုပ်နိုင်ပါသည်-

For Andriod
https://shorturl.at/uK23k

For IOS
https://rb.gy/vgdhqc

Subscribe to Myanmar Newspaper
https://t.me/myanmarnewspaper

Subscribe to The Global New Light of Myanmar
https://t.me/gnlmon

Subscribe to MOI
https://t.me/iprdrnd

View to mTube Video Streaming Platform
https://mtube.gov.mm