У Швейцарыі адкрыюць абноўлены помнік Тадэвушу Касцюшку

17 кастрычніка а 13:00 у Stadtpark у Золатурне адбудзецца ўрачыстае адкрыццё абноўленага помніка Тадэвушу Касцюшку. Цырымонія пройдзе па-беларуску, пасля яе ўдзельнікі наведаюць размешчаны побач Музей Касцюшкі.

Помнік быў усталяваны ў 2017 г. да 200-годдзя смерці Касцюшкі з ініцыятывы Алеся Сапегі, заснавальніка і тагачаснага кіраўніка Беларускага аб’яднання ў Швейцарыі.

Сёлета ініцыятыва MALDZIS разам з Фондам Марыі Магдалены Радзівіл, які ўзначальвае Сапега, абнавілі помнік: з’явіліся падмурак з беларускага валуна, новая мемарыяльная шыльда і брукаванка вакол яго. Камень апрацавалі, а шыльду вырабілі ў Мінску, пасля чаго матэрыялы даставілі ў Швейцарыю. Праект рэалізаваны на прыватныя сродкі Максіма Баграцова, Філіпа Дайнэкі і мецэнаткі, якая пажадала застацца непублічнай.

Менавіта ў Золатурне Касцюшка правёў апошнія гады жыцця і памёр 15 кастрычніка 1817 г.