Хәерле иртә, хөрмәтле укучыларыбыз! Бүген 12 июнь, әлеге сәгатькә булган кайбер хәбәрләрне барлыйк:

🔹Түбән Камада дрон күпфатирлы йортка килеп бәрелү аркасында өч кеше яраланган.

Татарстан рәисе Рөстәм Миңнеханов хәбәр иткәнчә, бүген иртән республиканың Кама аръягы районнарына дрон һөҗүме ясалган.

Миңнеханов шулай ук кайбер ширкәтләргә һөҗүм булуын әйтте, әмма исемнәрен атамады. Аның сүзләренчә, җитештерү эшчәнлеге туктатылмаган. Түбән Камада барлык киңкүләм чаралар кичектерелә.

🔹Украинадагы Telegram-каналлар "Тольяттикаучук" ширкәтендә янгын чыгуы турында хәбәр итә. Вячеслав Федорищев Самара өлкәсенә дроннар һөҗүм иткәнен раслаган. Аның сүзләренчә, һәлак булучылар да, җәрәхәтләнүчеләр дә юк.

🔹Брянски өлкәсен һөҗүм аркасында ике кеше һәлак булган, дип хәбәр итә хакимият вәкилләре. Тагын ике кеше яраланган диелә.

🔹Сумы өлкәсендә дрон һөҗүменнән соң бер хатын-кыз һәлак булган, тагын берсе җәрәхәтләнгән.

🔹Доналд Трамп янә Иран белән тиз арада тынычлык килешүе төзеләчәк дип белдерде. Тәһрән нинди дә булса килешүгә ирешү турындагы хәбәрләрне кире кага.