Жыхару Сянна кіраўніцтва пагражала пакараннем за адмову выходзіць на суботнік 🧹🪏🪚

Пра гэты выпадак ён распавёў прававому інспектару абласной Федэрацыі прафсаюзаў работнікаў культуры, інфармацыі спорту і турызму падчас прыёму 24 верасня. Пытанне пра суботнікі – невыпадковае. Бо менавіта ў Сенненскім раёне суботнікі абвяшчаюць часцей, чым у іншых рэгіёнах вобласці.

Прадстаўніца прафсаюзу дала вычарпальны адказ: суботнік – справа выключна добраахвотная, і кіраўнік не мае права абвясціць вымову ці накласці іншае дысцыпінарнае спагненне за адмову ўзяць удзел у суботніку. Пакараць работніка ён можа толькі за невыкананне або няякаснае выкананне сваіх працоўных абавязкаў. Адказ зразумелы і чаканы, але засталося яшчэ адно пытанне: ці будзе пакараны кіраўнік, які запалохвае падначаленых такімі пагрозамі?

Апошні раённы суботнік у Сенненскім раёне правялі 10 верасня: “неабыякавых грамадзян” паслалі добраўпарадкаваць аграгарадок Янова, дзе неўзабаве будуць праводзіцца раённыя “Дажынкі”.

Да таго ў красавіку сенненцы бралі ўдзел у Рэспубліканскім суботніку, у сакавіку – у раённым, і ўсё гэта – пад заклікі раённага кіраўніцтва “рабіць добрыя справы дзеля сваёй малай радзімы”, а па сутнасці – рабіць працу камунальных служб, якія не спраўляюцца са сваімі абавязкамі.