Аҟәатәи Жәларбжьаратәи аинформациа-технологиатә форум иалнаршоит Аԥсны IT-еилахәырақәа раалыҵқәа рылацәажәара, рԥышәа рколлегацәа рыцеиҩшара ҳәа рыԥхьаӡоит алахәылацәа.

Ареспублика StemLab актәи IT-школ адиректор Алмасхан Марколиа иажәақәа рыла, акадрқәеи афинансқәеи разымхара аамҭазы IT-технологиақәа апроблемақәа жәпакы рыӡбара рылшоит.

"Ҳара даара ҳаигәырӷьоит ас еиԥш иҟоу IT-форум аҽалархәра. Сара сгәы излаанаго ала, ари азҵаара иалацәажәатәуижьҭеи акрааҵуеит. Аԥсны иҟоуп IT еилазаара, иҟалап уи уаанӡа хаз-хазшәа иҟазар, аха ас еиԥш аусмҩаԥгатәқәа ари аусхк алахәылацәа хымԥада еиднакылоит", — иҳәеит иара.

Амобилтә операторцәа руак ицәырнагеит ацифратә сервисқәеи иццаку аинтернет 5g-и. Аилахәыра апиар-ҟәша анапхгаҩы Асҭанда Ҷкадуаԥҳа иазгәалҭеит афорум аԥыжәара шамоу ишиашоу аклиент иҿцәажәара алыршараз.

Аалыҵқәа ӡырнагеит аинтернет-проваидерқәа руак. Уахь иаҵанакуеит АТи асмартфонқәеи рзы ацҵа –урысшәалеи аԥсышәалеи онлаин кинотеатри апроект "Ишәарҭадоу ақалақьи".

"Ҳколлегацәеи ҳареи иҳамоуп алшара ара уажә ирыдаагало ҳапроектқәа ртәы асасцәа рыдагьы ареспублика астудентцәеи ауааԥсыреи рзеиҭаҳәараз", — ҳәа азгәалҭеит аилахәыра аӡыргареи амаркетинги рыҟәша анапхгаҩы Сариа Касланӡиаԥҳа.

🖇 Раԥхьатәи Аҟәатәи Жәларбжьаратәи аинформациа-технологиатә форум мҩаԥысуеит Аԥсны жьҭаара 16-18 рзы, уи иалахәуп 300-ҩык инареиҳаны, Урыстәыла арегионқәеи Нхыҵ Кавказ ареспубликақәеи рҟынтәи ахаҭарнакцәагьы уахь иналаҵаны.

Аҟәатәи Жәларбжьаратәи аинформациатә форум — еихдоу Урыстәылеи Аԥсни рфорум аҩбатәи аетап иахәҭакуп.
#social