Аҭагылазаашьа ҷыдакәа рминистрра аусзуҩцәа рымчала, ҳазҭагылоу аамҭаз ицәырҵыр зылшо ашәарҭарақәа ирызку алекциақәеи аинструктажқәеи рымҩаԥгара иалагоит Аԥсны ақыҭашколқәа рҿы ҳәа арадио Sputnik иазеиҭеиҳәеит АҶ рминистр Алиас Аҩӡба.

Уи адагьы, аминистр иажәақәа рыла, аусбарҭаҿ иазԥхьагәаҭоуп ашколхәыҷқәа рзы мацара акәымкәа, атәыла араионқәа руааԥсыра рзгьы, ашәарҭаратә ҭагылазаашьақәа раан ахымҩаԥгашьа иазку аилыркаагақәа разырхиара.

"Заанаҵ ауааԥсыра ргәырҽанҵара, разырхиара, шьаҿа-шьаҿала ауааԥсыра разыҟаҵара ҳҭахуп. Уи аус хымԥада еиуеиԥшым аусбарҭақәа алахәхоит", — иҳәеит Аҩӡба.

🖇 Аԥсны Арбџьармчқәа аплантә аоператив-тактикатә ҽазыҟаҵарақәа мҩаԥысуеит жьҭаара 12 инаркны. Уи аҳәаақәа ирҭагӡаны иахьа аусбарҭабжьаратә ҽазыҟаҵарақәа мҩаԥысит Очамчыра.

Аиқәырхаҩцәеи аруааи аԥырҩы дызҭам ахархәагақәа ржәылареи, аҭагылазаашьа ҷыдақәа раан ауааԥсыра ралгареи, ааха ахҟьаԥҟьақәа раԥыхреи рысценари аус адырулон.

Инеиҵыху аиҿцәажәара шәазыӡырҩыр ҟалоит абра.
#social