Аспециалистцәа ҿарацәа разыҟаҵареи агуманитартә еимадарақәа рыҿиареи рызҵаарақәа ирылацәажәеит аҳәынҭқарра ахада Бадра Гәынбеи Россотрудничество анапхгаҩы ихаҭыԥуаҩ Андреи Емелианови.

Аҳәынҭқарра ахада амаҵзуреи уи анапхгаҩ Игор Чаикеи Аԥсны адгыларази, ареспублика аҟынтәи астудентцәа аквотақәа рыла Урыстәылатәи аҵараиурҭақәа рҭалара алшарази иҭабуп ҳәа реиҳәеит.

Иара иазгәеиҭеит Аԥсны аграждантә авиациеи, аенергетикатә усхки, егьырҭ атехникатә хырхарҭақәеи рганахьала аспециалистцәа даара ишырҭаху.

"Иахьа ҳара иаабоит ҳабитуриентцәа ринтересқәа рыҽшырыԥсахуа. Уаанӡа еиҳарак азиндырратә, амедицинатә, аекономикатә занааҭқәа алырхуазар, иахьа еиҳа-еиҳа аинтерес аадырԥшуеит атехникатә хырхарҭақәа рахь. Ҳара ҳзы уи акырӡа аҵанакуеит", — ҳәа азгәеиҭеит Гәынба.

Емелианов иҳәеит Россотрудничество агуманитартә еизыҟазаашьақәеи аҵаратә программақәа рыдгылареи рырҿиара ишацнаҵо, иҟанаҵо ацхыраара амҽхак еиқәырханы.

"Ҳара ҳзы еиҳа ахә ҳаракуп ари аус аҭагылазаашьатә ҟазшьа ахьамам, ииашаҵәҟьаны атәыла аизҳазыӷьаразы иахьазынархоу", — ҳәа иазгәеиҭеит иара.