Аԥсны зҽаԥсазтәыз ажурналист Борис Қаџьаиа иахьа 75 шықәса ихыҵит.

Ажурналистика амҩа дануижьҭеи шәышықәсабжа инаӡоит — 50 шықәса ҵуеит Қаџьаиа агазеҭ "Аԥсны" аредакциаҿ аус иуеижьҭеи.

Аԥсны Аџьынџьтәылатә еибашьра аамҭазы Борис Қаџьаиа арратә корреспондентс дыҟан, 2012 шықәса раахыс агазеҭ аредактор хада ихаҭыԥуаҩыс аус иуеит.

Қаџьаиа — "Ахьӡ-Аԥша" аорден III аҩаӡара ианашьоуп. Иара аԥсуа милаҭтә кьыԥхь аҿиараҿы илагала дууп, дравторуп астатиақәеи аочеркқәеи рацәаны ҳәа аҳәоит Аԥсны Ажурналистцәа реидгыла адныҳәалараҿы.

Ажурналистцәа реидгыла анапхгара Борис Қаџьаиа изеиӷьаршьеит агәабзиара, аманшәалара, ақәранҵыра ду.