Гагра араион ахадара апринц Ольденбургтәи иаҳҭынра аҵакырахь аҭаларазы ахәԥса ршәоит ҳәа иҟоу аинформациа еилдыргоит ҳәа Sputnik иазеиҭеиҳәеит атуризм аҟәша аиҳабы Дамеи Базба.

"Ааи, арҭ акьыԥхьымҭақәа аабон, аха аҭоурых-культуратә ҭынха аобиект аҭаларазы аӡәы аԥара шигоз азы ишьақәыргылоу афактқәа макьана иҳамаӡам. Еилаҳкаалоит", — ҳәа азгәеиҭеит иара.

Базба иҳәеит абаа ахатәхаҿы қьырала ишимоу, уа аиҭашьақәыргыларатә усурақәа шымҩаԥысуа. Иара иахьынӡеидыруала аобиект аҭааҩцәа рзы иаркуп.

Иара иажәақәа рыла, азакәан инақәыршәаны, ас еиԥш аусура амҩаԥгаразы азин узҭо адокументқәа умазароуп. Усеиԥш азин ыҟамзар, аиҳабыра азин рымоуп закәаншьаҭада анаплакратә усура ахараԥса ақәҵара.

🖇 Уаанӡа асоциалтә ҳақәа рҿы ирылаҵәеит авидеонҵамҭа, Аԥсны атәылауаа ҩыџьа апринц Ольденбургтәи иаҳҭынра аҩналаразы ахәԥса ахшәааразы аҭыԥ шьақәдыргылеит ҳәа аазрыԥшуаз.