Аԥсны жәлар Рџьынџьтәылатәи еибашьраҿы Аиааира агара аныҳәа азгәарҭеит Гал.

Амш иалагеит иҭахаз аибашьцәа рбаҟа амҵан ашәҭ шьыҵәрақәа рышьҭаҵарала. Амемориал аҿаԥхьа еизеит араион ашколқәа зегьы рҵаҩцәа абираҟқәеи ашәҭқәеи рыманы, аибашьра аветеранцәа, ахадара анапхгара, араионтә Еизара адепутатцәа, ауаажәларра рхаҭарнакцәа, ақалақь ауааԥсыра ҳәа аанацҳауеит "Гал-Медиа".

Аныҳәа иацҵан араионтә культура аҩнаҿы. Араҟа имҩаԥысит Аиааиреи Ахьыԥшымреи Рымш иазкыз аконцерт.

"Ҳара ахаангьы иаҳхашҭуам аибашьра адәаҿы иҭахаз, аҩныҟа имхынҳәыз, зегь реиҳа зыхә ҳаракыз — зыԥсҭазаара Аԥсны ахақәиҭра иахҭнызҵаз, иахьа аҭынч жәҩан аҵаҟа ҳанхаларц азы", — ҳәа араион аветеранцәеи ауааԥсыреи дрыдныҳәалеит ахада Константин Ԥлиа.

Аныҳәа хыркәшахеит аестрада-фольклортә ансамбль "Мырзаҟан" аконцерт ала. Ахәаԥшцәа рзы игеит амилаҭтә ашәақәа, ицәырган акәашаратә номерқәа.

Аԥсны иахьа иазгәарҭоит Аиааиреи Ахьыԥшымреи Рымш. Ареспублика ақалақьқәеи араионқәеи зегьы рҿы аныҳәатәи агәалашәаратәи усмҩаԥгатәқәа мҩаԥысит.
#social