COVID-19 одамларни қувонч ҳиссидан маҳрум қилмоқда — олимлар вирус дофамин рецепторларига зарар етказишини аниқлади.

Сўнгги пайтларда атрофимизда кайфияти йўқ, ҳаётдан завқ олмаётгандек кўринадиган одамларни аввалгидан кўпроқ учратаётгандекмиз. Кимдир доимий чарчоқдан шикоят қилади, кимдир аввал қизиқиб бажарган ишларига ҳам ҳафсала қилмай қўйган. Ажабланарли тарафи, бунинг асосий сабабларидан бири ковид асорати экан.

Касаллик миянинг мотивация, бахт ҳисси ва хотира учун масъул соҳасига таъсир кўрсатади. Инсон COVID-19 билан қанчалик оғир касалланган бўлса, унинг оқибатлари ҳам шунчалик жиддий бўлади.

Канадалик тадқиқотчилар узоқ давом этувчи COVID-19 аломатлари кузатилаётган 24 нафар беморнинг миясини текшириб, натижаларни 24 нафар соғлом инсон кўрсаткичлари билан таққослаган. Маълум бўлишича, касаллик асоратларидан азият чекаётганларда миянинг дофамин тизими билан боғлиқ айрим кўрсаткичлар сезиларли даражада пасайган.

COVID-19 билан касалланиб тузалган одамларда дофамин ишлаб чиқарувчи нерв толалари учларининг зичлиги камайгани қайд этилган. Энг ёмони, соғайгандан кейин улар ўз-ўзидан тикланмайди.