Янги Тошкентда йирик ресторан тармоқлари ўз филиалларини очишга тайёргарлик кўрмоқда

“Сыроварня”, EVOS, Safia, Bellissimo Pizza, FeedUp, Ahmad Oltin Jo‘ja, Gōsht ва бошқа йирик брендлар раҳбарлари Савдо-саноат палатаси ҳамда Янги Тошкент дирекцияси билан шаҳардаги истиқболли тижорат майдонларини кўздан кечирди.

Тадбиркорлар 55 минг кишилик стадионда ресторанлар учун ажратилган 4 500 квадрат метр майдон, “Шарқ баҳори” турар жой мажмуаси ва келажакда аҳоли гавжум бўлиши кутилган савдо кўчаларига қизиқиш билдирди.

Учрашувларда ресторанлар учун қулай жойларни аукционга чиқариш, ижара шартлари ва бир нечта брендни ягона гастрономик ҳудудда жойлаштириш масалалари муҳокама қилинди.

Маълумот учун, Янги Тошкентда давлат томонидан қурилган 20 минг хонадоннинг биринчи қаватларида 1 150 та савдо ва хизмат кўрсатиш объекти мавжуд. Уларнинг бир қисми аллақачон ижтимоий муассасалар учун ажратилган, қолганларидан тадбиркорлик мақсадида фойдаланиш имконияти бор.

Шаҳардаги дастлабки 100 ўринли “Хива” ресторани эса ўз фаолиятини бошлади.

@pressuzb